Arnitołahi znajšli pad Hrodnam redkuju dla Biełarusi čyrvonavallovuju kazarku. Infarmacyju pra heta raźmiaściŭ na sajcie «Ptuški štodnia» arnitołah, namieśnik staršyni abłasnoha adździaleńnia HA «Achova ptušak Baćkaŭščyny» Dźmitryj Vinčeŭski, paviedamlaje BiełTA.
Ilustracyjnaje fota: zoologist.ru
Niačastuju hościu Biełarusi zaŭvažyli ŭ Bierastavickim rajonie pamiž vioskami Jermałovičy i Alekšycy 17 i 19 sakavika.
Redkaja ptuška ščypała travu ŭ pojmie Śvisłačy siarod husiej. Padčas viasnovych nazirańniaŭ kazarku spačatku pabačyła pry pavieličeńni zroblenych 17 sakavika zdymkaŭ adna z udzielnic hramadskaha abjadnańnia, a praź dzień jaje ŭbačyli tam ža ŭžyvuju.
Hety vid kazarki (łac. Branta ruficollis) zaniesieny ŭ Mižnarodnuju čyrvonuju knihu i achoŭvajecca šeraham mižnarodnych pahadnieńniaŭ. U Čyrvonaj knizie Rasii jana maje status redkaha vidu. Zvyčajna ptuška hniazdujecca ŭ tundrach RF, a miescam zimovaha pražyvańnia vybiraje aziory ŭ Bałharyi, Rumynii ci Hrecyi. U Biełarusi hetych ptušak vyjaŭlajuć daloka nie kožny hod, zvyčajna heta vypadkovyja zalotnyja asobiny. U Hrodzienskaj vobłaści čyrvonavallovuju kazarku ŭpieršyniu adznačyli ŭ 2012 hodzie taksama na ŭčastku Śvisłačy — vadapłaŭnaja ź siamiejstva kačynych była zaŭvažanaja usio ŭ toj ža kampanii šerych husiej. Vallak i hrudzi ŭ takoj kazarki čyrvona-rudyja, adździelenyja biełymi pałosami ad čornaha apiareńnia šyi i brucha.
