Zajavu Mitrapalita Tadevuša Kandrusieviča — staršyni Kanfierencyi Katalickich Biskupaŭ u Biełarusi cytuje catholic.by.
| Aeraport h. Frankfurt-na-Majnie, 26 sakavika 2017 h. Znachodziačysia ŭ aeraporcie Frankfurta, pa darozie sa Złučanych Štataŭ Amieryki ŭ Biełaruś, ź vialikaj zaniepakojenaściu ja ŭspryniaŭ situacyju, jakaja ŭźnikła u Minsku i inšych haradach padčas učarašnich i siońniašnich padziej. Niedachop času nie dazvalaje całkam asensavać stanovišča, jakoje ŭźnikła, ale jano nahadvaje pra składanaść vyklikaŭ, jakija siońnia paŭstali pierad našaj Baćkaŭščynaj. Historyja biełaruskaha naroda śviedčyć ab tym, što jon zaŭsiody vyłučaŭsia svajoj razvažlivaściu i znachodziŭ mirnyja šlachi dla vyrašeńnia ŭźnikajučych prablem. 25 sakavika Katalicki Kaścioł adznačaŭ uračystaść Źviestavańnia Pana, kali my razvažali nad tym, što Boh vybraŭ Maryju być Maci Zbaŭcy. Jana pryniała Božuju volu, i pad jaje Biezzahannym Sercam pačało bicca Serca Jezusa — Vaładara spakoju, padčas naradžeńnia jakoha aniolskija chory śpiavali: «Chvała na vyšyniach Bohu, a na ziamli mir ludziam dobraj voli». Taksama i nam, darahija suajčyńniki, nieabchodna pieradusim pryniać zaklik Boha da ŭzajemnaha prymireńnia, pakul nie zojdzie sonca, jak kaža Śviatoje Pisańnie, kab nie nastupiła noč supraćstajańnia. U suviazi z hetym zaklikaju dziaržaŭnuju ŭładu i jaje apanientaŭ, a taksama hramadskija arhanizacyi i ludziej roznych pohladaŭ da kanstruktyŭnaha dyjałohu z metaj vyrašeńnia isnujučych prablem dla dabra našaha naroda i kansalidacyi hramadstva. Vykazvaju nadzieju na humannyja i spraviadlivyja adnosiny da zatrymanych i spadziajusia na chutčejšaje ich viartańnie dadomu. Dzieva Maryja, Vaładarka spakoju, vyprasi biełaruskamu narodu ŭ svajho Syna Jezusa Chrysta łasku mirnaha žyćcia i pavahi adno da adnaho, z zachavańniem dadzienych nam Tvorcam pravoŭ i vykanańniem uskładzienych na nas abaviazkaŭ. Z malitvaj ab miry ŭ našaj Baćkaŭščynie.Arcybiskup Tadevuš Kandrusievič |
