Prysutnyja na cyrymonii ŭručeńnia ŭznaharod nacyjanalnaj premii «Nika» avacyjaj sustreli pramovu režysiora Alaksandra Sakurava, u jakoj jon vystupiŭ u abaronu ŭdzielnikaŭ mitynhaŭ 26 sakavika. Sa słovami padtrymki vystupili i inšyja ŭdzielniki cyrymonii.
Łaŭreaty rasijskaj nacyjanalnaj premii «Nika» ŭ halinie kiniematahrafii padčas uručeńnia ŭznaharod vystupili ŭ padtrymku palitviaźniaŭ, a taksama ludziej, zatrymanych na akcyjach pratestu 26 sakavika ŭ Maskvie.
Paśla pramovy režysiora Alaksandra Sakurava, jaki atrymaŭ premiju imia Eldara Razanava «Honar i hodnaść», zała zładziła avacyju, mnohija prysutnyja ŭstali.
U pačatku svajoj pramovy Sakuraŭ zajaviŭ, što čakaje rašeńnia ad Pucina pytańnia, jakoje jany abmiarkoŭvali, — pra los ŭkrainskaha režysiora Aleha Siancova, asudžanaha ŭ Rasii da 20 hadoŭ źniavoleńnia.
Sakuraŭ nazvaŭ pamyłkaj adsutnaść dyjałohu z moładździu, jakaja vyjšła na vulicy. «Dziaržava ździajśniaje vialikuju pamyłku, viedučy siabie hetak familjarna z maładymi ludźmi, z školnikami i sa studentami. <…> Nielha pačynać hramadzianskuju vajnu siarod školnikaŭ i studentaŭ. Treba pačuć ich. Nichto z našych palitykaŭ nie žadaje ich pačuć, nichto ź imi nie razmaŭlaje. <…> Jany bajacca heta rabić. Čamu? Heta niemahčyma, bolš tryvać heta niemahčyma», — adznačyŭ Sakuraŭ.
Jon źviarnuŭ uvahu na žorstkija dziejańni pravaachoŭnych orhanaŭ na masavych akcyjach, asabliva suprać dziaŭčat i žančyn. «Ja chaču źviarnucca da našych deputataŭ. Da mužčyn-deputataŭ, tamu što žančyny takoha zakona novaha nie prymuć. Davajcie my prymiem zakon, jaki zabaraniaje aryštoŭvać i naohuł dakranacca da žančyn i dziaŭčat, jakija ŭdzielničajuć u pratestnych akcyjach», — prapanavaŭ režysior, pramova jakoha nieadnarazova pieraryvałasia apładysmientami i vykrykami« Brava!».
Cyrymonija ŭručeńnia premii na rasijskich fiederalnych telekanałach nie tranślavałasia.
