Biełstat padličyŭ nasielnictva ŭsich haradoŭ i miastečak Biełarusi pa stanie na pačatak 2017 hoda.
Astraviec. Fota Iryny Arachoŭskaj.
Jakija cikavyja ličby možna zaŭvažyć?
1. Siarod abłasnych haradoŭ najbolšy pastajanny pryrost demanstruje Hrodna. Nasielnictva horada składaje 368 710 čałaviek, i ŭžo zusim chutka pierahonić Viciebsk (tam žyvuć 369 933 čałaviek). Niedaloka znachodzicca i Mahiloŭ (380 440 čałaviek). Pry zachavańni ciapierašniaj dynamiki Hrodna praź niekalki hadoŭ zmoža stać trecim horadam krainy, uśled za Minskam i Homielem.
2. Pakolki pravincyja vymiraje, stanovicca ŭsio bolš rajonaŭ z krytyčna nizkim uzroŭniem nasielnictva. U Rasonskim rajonie žyvuć 9350 čałaviek, u Krasnapolskim — 9520, u Drybinskim — 9870. Na miažy jašče Naraŭlanski (10430) i Chocimski (10640). Ci jość sens u isnavańnie takich rajonaŭ? Pytańnie pieradusim ekanamičnaje, bo ŭ kožnym z hetych vypadkaŭ asobnaja administracyja pracuje dla takoj samaj kolkaści ludziej, jak kvartał novabudoŭlaŭ u stalicy.
3. Nasielnictva Minska praciahvaje padbiracca da 2 miljonaŭ (pakul što 1 974 819 čałaviek). Adnak heta havorka tolki pra administratyŭnyja miežy horada. Naprykład, u Kałodziščach, kudy zajazdžaje staličny haradski hramadski transpart, žyvie jašče kala 17,5 tysiačy čałaviek. I heta farmalna ŭ ahrahraradku!
Adnačasova praciahvajecca i raźvićcio spadarožnikaŭ. I Fanipal, i Zasłaŭje, i Łahojsk, i Smalavičy, i Dziaržynsk — usie va ŭpeŭnienym plusie.
* * *
Top biełaruskich haradoŭ pa pryroście nasielnictva:
| Horad | 2017 | 2016 | % | |
| 1 | Astraviec | 10 253 | 9569 | 7,15% |
| 2 | Fanipal | 15 922 | 15 198 | 4,76% |
| 3 | Homiel | 535 229 | 521 452 | 2,64% |
| 4 | Stolin | 13 269 | 12 951 | 2,46% |
| 5 | Horki | 34 553 | 33 830 | 2,14% |
| 6 | Dobruš | 18 760 | 18 380 | 2,07% |
| 7 | Ašmiany | 16 684 | 16 388 | 1,81% |
| 8 | Zasłaŭje | 15 419 | 15 151 | 1,77% |
| 9 | Łahojsk | 12 950 | 12 739 | 1,66% |
| 10 | Łuniniec | 24 712 | 24 412 | 1,23% |
| 11 | Kalinkavičy | 40 315 | 39 860 | 1,14% |
| 12 | Miadzieł | 6949 | 6871 | 1,14% |
| 13 | Brest | 343 985 | 340 141 | 1,13% |
| 14 | Skidziel | 10 709 | 10 592 | 1,1% |
My ŭklučyli ŭ śpis tyja harady, dzie nasielnictva vyrasła bolš čym na 1%.
Fienomien Astraŭca źviazany z budaŭnictvam atamnaj elektrastancyi. A voś skačok Homiela tłumačycca tym, što ŭ miežy horada ŭklučyli 10-tysiačny rabočy pasiołak Kaściukoŭka.
