Invalid pieršaj hrupy Alaksandar Rabiec ź miastečka Paryčy praz poštu atrymaŭ pastanovu za podpisam sudździ Śvietłahorskaha rajonu Ludmiły Siadźko, pavodle jakoj jon aštrafavany na 10 bazavych vieličyniaŭ (230 rubloŭ) za repost videa pra akcyju anarchistaŭ.

«Na sud mianie nie vyklikali, bo ŭ pratakole, składzienym učastkovym na padstavie artykuła 17.11 KaAP, ja paznačyŭ, što zhodny z vystaŭlenymi pretenzijami», — kaža Rabiec.

U sudovaj pastanovie, jakuju vyniesła sudździa Siadźko jašče 14 sakavika, skazana, što Alaksandar Rabiec 2 sakavika «z dapamohaj mabilnaha telefona marki «Samsunh», skarystaŭšy akaŭnt «Saša Rabiec» (vk.com), raźmiaściŭ u adkrytym dostupie dla ahulnaha ahladu spasyłku na infarmacyjny materyjał supołki «ŬKantakcie»: «Homiel: akcyja anarchistaŭ suprać uładaŭ (Videa)» ad 11.01.2016 hodu — «pradukcyju, uklučanuju ŭ respublikanski śpis ekstremisckich materyjałaŭ»». Adnačasova sud pryznaŭ, što skład złačynstva ŭ dziejańniach Rabca adsutničaje.

«Adsiul, peŭna, minimalny štraf, — dadaje invalid. — Tym nia mienš sudździa vyrašyła kanfiskavać moj mabilny telefon».

Alaksandru 49 hadoŭ, bolšuju častku ź ich jon pravioŭ u łožku. Da 1991 hodu rabiŭ kałhasnym kiroŭcam, ale trapiŭ u avaryju. Ad taho j invalidnaść. Mabilny telefon byŭ zaŭsiody pry im jak srodak znosin ź biełym śvietam.

Štraf za analahičny ŭčynak nakładzieny 21 sakavika Chojnickim rajonnym sudom na 26-hadovaha miascovaha žychara Maksima Maksimienku. I pamier štrafu adnolkavy — 10 bazavych.

Maksimienka jašče ŭ śniežni 2015 hodu, skarystaŭšy svoj akaŭnt u sacyjalnaj sietcy «ŬKantakcie», raźmiaściŭ spasyłku na infarmacyjny materyjał: «Žłobin: anarchisty zaklikajuć da strajku». Pravaparušeńnie vyjaŭlena tolki sioleta, 2 sakavika.

«Sudździa Kardaš, małady taki juryst, jaki razhladaŭ maju administracyjnuju spravu, — kaža aštrafavany Maksimienka, — patłumačyŭ, što nijak nia moža mianie vyzvalić ad adkaznaści, bo pieršasny materyjał pastupiŭ z KDB. Kali b ja svoječasova vydaliŭ hety videasiužet sa svajoj staronki, to nijakaj spravy nie było b. A to pad im było čatyry kamentary i adzin repost. Vyhladaje, što ja spryčyniŭsia da raspaŭsiudu ekstremisckich materyjałaŭ».

Anarchisckaja supołka «Revalucyjnaje dziejańnie» i jaje paviedamleńni zaniesienyja ŭ śpis ekstremisckich u 2016 hodzie i zablakavanyja dla dostupu ŭ Biełarusi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?