Krama posudu «Kryštal» na praśpiekcie Niezaležnaści, 39 pracuje apošnija miesiacy — na jaje miescy adkryjecca fastfud z uporam na biełaruskuju nacyjanalnuju kuchniu. Hetuju infarmacyju TUT.BY paćvierdzili ŭ Minharvykankamie i ŭ ŽREA Centralnaha rajona, na bałansie jakoha znachodzicca pamiaškańnie kramy.

Krama «Kryštal» na płoščy Pieramohi adkryłasia bolš za 23 hadoŭ tamu. Tut pradajuć posud sa škła i farforu biełaruskaj i zamiežnaj vytvorčaści, skurhałantareju, kaśmietyku. Pieraprafilavać abjekt u centry Minska ŭ fastfud, jak raspaviadaje infarmavanaja krynica, papiaredni akcyjanier — Juryj Marozaŭ — chacieŭ jašče dva hady tamu. Tady kiraŭnictva kramy tłumačyła, što jana stała stratnaj i prasiła dać dazvoł na adkryćcio na miescy «Kryštala» piceryi Sbarro ci fastfudu Burger King, dadaje surazmoŭca. Ale horad nasustrač nie pajšoŭ, jak i ŭ vypadku z «Łakomkoj», ź jakoj biznesmien taksama chacieŭ zrabić zamiežny fastfud.

Pa słovach krynicy, u śniežni Juryj Marozaŭ pradaŭ svaje akcyi ZAT «Kryštal» kampanijam TAA «Miłkimpeks» i STAA «AŁS-Inviest». Jany ž źviazanyja z saŭładalnikam restarana «Druźja» i ŭładalnikam franšyzy Texas Chicken Viktaram Saŭčukom. Adnym z pradstaŭnikoŭ hetych kampanij taksama źjaŭlajecca viadomy spartyŭny funkcyjanier, eks-dyrektar minskaha handbolnaha «Dynama» Michaił Majeŭski.

Novyja akcyjaniery ŭsio-taki damahlisia dazvołu horada na adkryćcio na miescy kramy fastfudu, kaža surazmoŭca. Užo ŭ lutym hetaha hoda «Kryštal» staŭ rassyłać usim partnioram listy ab rearhanizacyi.

Kiraŭnictva kramy situacyju nijak nie kamientuje. Ale ŭ ŽREA Centralnaha rajona, jakomu i naležyć pamiaškańnie, paćviardžajuć, što da vosieni na miescy kramy źjavicca fastfud. Ale nie amierykanski, a biełaruski.

— Kiraŭnictvam Minharvykankama ŭzhodnienaje pytańnie ab pieraprafilavańni i raźvićci na miescy kramy sietki hramadskaha charčavańnia pad nazvaj «BulbaStar». Heta budzie sietka fastfudu z elemientami nacyjanalnaj biełaruskaj kuchni, — raspavioŭ dyrektar ŽREA Centralnaha rajona Andrej Rybačonak. — Na dadzieny momant ZAT «Kryštal» zaklučyła dahavor ź inžyniernaj kampanijaj i aktyŭna zajmajecca padrychtoŭkaj prajektna-kaštarysnaj dakumientacyi dla pačatku rabot pa rekanstrukcyi pamiaškańnia. Paralelna vyrašajecca pytańnie ab atrymańni dazvołu ŭ Minkulcie, pakolki budynak maje status historyka-kulturnaj kaštoŭnaści. Užo byli apytanyja i pradastaŭlenyja śpisy žycharoŭ doma, jakich apaviaščali ab pieraprafilavańni kramy — pakul pytańniaŭ tut nie ŭźnikła. Dakładnych terminaŭ, kali pačnucca raboty pa rekanstrukcyi pamiaškańnia, niama — usio budzie rabicca pa miery ŭzhadnieńnia dazvolnaj i prajektnaj dakumientacyi. Mahčyma, heta adbudziecca ŭžo ŭ krasaviku. Adkryć abjekt hramadskaha charčavańnia aryjentyrovačna płanujuć u listapadzie.

Infarmacyju ab namiery novych uładalnikaŭ pamiaškańnia adkryć na miescy «Kryštala» biełaruski fastfud paćvierdziŭ i namieśnik staršyni Minharvykankama Andrej Damaracki.

«Minharvykankam i ja asabista zaŭsiody padtrymlivajem stvareńnie biełaruskaha, nacyjanalnaha. Ale pakul heta tolki kancepcyja. Budziem hladzieć, jak jana budzie raźvivacca. Pry nieabchodnaści budziem dapamahać, bo my pavinny stvarać alternatyvu zamiežnamu fastfudu», — skazaŭ jon.

U kampanii «Miłkimpeks» raskryvać padrabiaznaści ab tym, što ź siabie budzie ŭjaŭlać biełaruski fastfud, admovilisia.

Клас
Панылы сорам
Ха-ха
Ого
Сумна
Абуральна