U dypłamatyčnym archivie Niamieččyny 29 sakavika byŭ znojdzieny aryhinał Akta ab niezaležnaści Litvy ad 16 lutaha na litoŭskaj movie. Hetuju infarmacyju BNS paćvierdziŭ prafiesar univiersiteta imia Vitaŭta Vialikaha Ludas Mažylis.
«Pobač ź niamieckim varyjantam u spravie byŭ litoŭski varyjant pastanovy z usimi 20-ju vidavočna aryhinalnymi podpisami», — skazaŭ BNS Mažylis. Pavodle jaho słoŭ, list byŭ składzieny, što paćviardžaje, što jaho dasłali pa pošcie. Akt byŭ padšyty ŭ spravu ŭ sakaviku. Mažylis skazaŭ, što zaniacca pošukami akta jaho zaachvociła nabližeńnie stahodździa z dnia hetaj padziei.
«Ja napisaŭ elektronny list u Dziaržaŭny archiŭ Hiermanii, napisaŭ, što mianie cikavić hety pieryjad i što mienavita mianie cikavić. Ja atrymaŭ śpis spraŭ, u jakija varta zazirnuć, što ja i zrabiŭ. Na heta spatrebiłasia tolki dva dni», — skazaŭ Mažylis.
Akt 16 lutaha — dakumient, jaki byŭ składzieny i padpisany Tarybaj Litvy pad staršynstvam Jonasa Basanavičusa 16 lutaha 1918 hoda ŭ Vilni. Akt u palityčnym archivie MZS Hiermanii zachoŭvaŭsia ŭ hrupie spraŭ pad nazvaj «Budučynia bałtyjskich pravincyj: Litva». Pa słovach Mažylisa, u spravie taksama znojdzieny akt ab niezaležnaści ad 11 śniežnia 1917 hoda z 19-ju podpisami.
Aryhinał akta byŭ pieradadzieny Basanavičusu, ale nikoli nie ahałošvaŭsia. Ab miescaznachodžańni jaho dublikata ničoha nie było viadoma z 1940 hoda, kali Litva była akupavanaja SSSR. Da 1940 h. jon zachoŭvaŭsia ŭ archivie prezidenckaha pałaca ŭ Kaŭnasie. Niekalki hadoŭ tamu ŭ ŚMI była infarmacyja, byccam akt mohuć zachoŭvać svajaki prezidenta Antanasa Śmiatony.
Kancern MG Baltic Darusa Mockusa prapanavaŭ miljon jeŭra za aryhinał Akta 16 lutaha 1918 hoda.
