Sudy ŭ Biełarusi razhladajuć usie spravy indyvidualna, usie vydumki, što jany dziejničajuć pa zadadzienaj prahramie, — heta sproby ačarnić pravasudździe, ličyć pieršy namieśnik staršyni Viarchoŭnaha suda Valeryj Kalinkovič. Jon pahutaryŭ z žurnalistami TUT.BY pierad pasiadžeńniem plenuma VS pa pytańniach administracyjnaha sudavodstva.

Fota: TUT.BY

Fota: TUT.BY

Adkazvajučy na pytańnie TUT.BY, čamu sudy pa ŭsioj krainie pačali čaściej vynosić aryšty ŭdzielnikam masavych mierapryjemstvaŭ, chacia amal dva apošnija hady abmiažoŭvalisia štrafami, Kalinkovič adznačyŭ:

— Pry razhladzie kožnaj spravy — ci heta budzie kryminalnaja, ci administracyjnaja sprava, — kali havorka idzie ab pryznačeńni miery adkaznaści, pavinien vykonvacca pryncyp indyvidualizacyi adkaznaści. Adnym słovam, u adpaviednaści z hetym pryncypam sudy i padychodziać da razhladu spraŭ.

Sudździa dadaŭ, što, kali adzin z bakoŭ nie zhodny z pryniatym rašeńniem, jon moža abskardzić jaho ŭ sudzie vyšejšaj instancyi.

— Vydumki, jakija raspaŭsiudžvajucca niekatorymi resursami i ŚMI, ab tym, što sudy dziejničajuć pa niejkaj zadadzienaj prahramie, nie adpaviadajuć rečaisnaści i źjaŭlajucca nie čym inšym, jak sprobami ačarnić biełaruskaje pravasudździe ŭ vačach niedaśviedčanych u pytańni prava hramadzian.

Druhoje pytańnie TUT.BY datyčyłasia situacyi z žurnalistam «Biełsat» Alaksandram Barazienkam. Jaho, nahadajem, adpravili na 15 sutak aryštu paśla Dnia Voli na padstavie pakazańniaŭ supracoŭnikaŭ milicyi, jakija kazali, što jon łajaŭsia matam, razmachvaŭ rukami i nie nazvaŭsia žurnalistam. Na sudzie było prademanstravana videa zatrymańnia, źniataje samim Barazienkam, jakoje nie paćviardžaje hetyja pakazańni milicyjantaŭ.

Žurnalisty zapytalisia ŭ Valeryja Kalinkoviča, jak u takim vypadku naohuł možna dakazać svaju nievinavataść u administracyjnym pracesie.

— Vy ciapier chočacie prymusić mianie ŭmiašacca ŭ ažyćciaŭleńnie pravasudździa. Kali Alaksandr Barazienka abo niechta jašče nie zhodny z vynikami razhladu jaho spravy sudami pieršaj instancyi, jon maje prava źviarnucca sa skarhaj u vyšejšy sud. Usie jaho dovady ab tym, što sud čahości nie ŭličyŭ, čahości nie daśledavaŭ albo pryniaŭ niapravilnaje rašeńnie, buduć uvažliva razhledžany i atrymajuć acenku kampietentnaha suda. Ja hetyja dovady aceńvać tut i ciapier nie maju prava. Ja zaraz vykažusia, a paślazaŭtra Minharsud budzie razhladać skarhu Barazienki. Heta niedapuščalna — mnie vykazvacca pa kankretnaj spravie na ŭsiu krainu.

Pieršy namieśnik staršyni VS adznačyŭ taksama, što pry nakładańni administracyjnaha spahnańnia sudami ŭličvajucca asoba, stupień viny, charaktar i pamiery škody, majomasnaje stanovišča, abstaviny, jakija źmiakčajuć abo abciažarvajuć stanovišča.

Viartajučysia da pytańnia ab tym, što pa ŭsioj krainie sudy stali čaściej davać aryšty zamiest štrafaŭ za spravy pa vynikach masavych mierapryjemstvaŭ, Kalinkovič dadaŭ:

— Sudździ vyrašyli tak, ich nichto nie prahramavaŭ. Ich nichto nie moža prahramavać u pryncypie, heta parušeńnie zakona, jakoje praduhledžvaje ŭ tym liku kryminalnaje pakarańnie da piaci hadoŭ pazbaŭleńnia voli, pavodle 392 artykuła KK. Vy ličycie mianie idyjotam? Ja nie chaču siadzieć piać hadoŭ.

Na siońniašnim plenumie Viarchoŭnaha suda płanujecca razhledzieć pytańni abskardžvańnia pastanoŭ pa administracyjnych spravach. U pres-relizie VS da plenuma havorycca, što sudy nie zaŭsiody zabiaśpiečvali ŭmovy dla realizacyi ŭdzielnikami administracyjnaha pracesu prava na abskardžańnie pastanoŭ pa ich spravach. Kamientujučy padrychtoŭku pasiadžeńnie plenuma, Kalinkovič dadaŭ:

— My majem namier paćvierdzić ŭstanoŭki, jakija ŭtrymlivajucca ŭ zakonie, pra nieabchodnaść stroha indyvidualnaha padychodu da kožnaj spravy ab administracyjnym pravaparušeńni, ab vyznačeńni taho, chto vinavaty, zakonnaj i spraviadlivaj miery adkaznaści, ab biezumoŭnym zachavańni pryncypu prezumpcyi nievinavataści.

Pavodle jaho słoŭ, hetyja ŭstanoŭki ŭ cełym siońnia vytrymlivajecca ŭ rabocie sudoŭ.

— Treba surjozna zaniacca pierahladam administracyjna-pravavych sankcyj z metaj ich aptymizacyi. U pryvatnaści, mahčyma, nieabchodna admovicca ad ŭviadzieńnia nižniaha paroha administracyjnaha spahnańnia ŭ vyhladzie štrafaŭ u kankretnych składach pravaparušeńniaŭ.

Valeryj Kalinkovič vystupiŭ taksama za toje, kab pašyryć mahčymaści pa vyzvaleńni ad administracyjnaj adkaznaści pry najaŭnaści źmiakčalnych abstavinaŭ i ŭnieści ŭ zakon papraŭki, jakija dazvolać naohuł nie pačynać administracyjny praces pry małaznačnaści pravin.

Клас
0
Панылы сорам
0
Ха-ха
0
Ого
0
Сумна
0
Абуральна
0