Ministerstva handlu i antymanapolnaha rehulavańnia (MARH) moža ŭpieršyniu prymianić sankcyi suprać handlovaj sietki «Jeŭraopt» za parušeńnie praviłaŭ kankurencyi ŭ rehijonach. U siami rajonach Biełarusi rytejler zabraŭ pad siabie bolš za dapuščalnyja 20% rynku. Pra heta ŭ paniadziełak raspavioŭ kiraŭnik MARHa Uładzimir Kałtovič.
Letaś ministerstva ŭžo vydavała «Jeŭraoptu» papiaredžańni. Ale prablema tak i nie vyrašyłasia. Tamu MARH hatovy na sankcyi ŭ dačynieńni da handlovaj sietki. Da hetaha jany jašče ni da kaho z rytejleraŭ nie ŭžyvalisia, što mienavita pahražaje kampanii, niezrazumieła. Pavodle zakona, usie ździełki, zroblenyja z parušeńniem kvoty, pryznajucca niadziejnymi.
Asnoŭny kankurent «Jeŭraopta» ŭ małych haradach i na vioscy — kramy Biełkaapsajuza. Uładzimir Kałtovič pryznajecca, što ŭ tych rehijonach, kudy prychodzić pryvatnik, i dziaržaŭnaja sietka pačynaje pracavać lepš.
— Treba vyrašyć adno pytańnie: albo my praciahvajem raźvivać Biełkaapsajuz, albo spryjajem raźvićciu kankurencyi, — skazaŭ Uładzimir Kałtovič.
- My nie pieraškadžajem raźvićciu roznych handlovych sietak u rehijonach. Jość šmat nievialikich kampanij, jakija nie zaŭsiody na słychu, ale jany raźvivajucca ŭ małych haradach, atrymlivajučy padtrymku.
Alternatyvaj bujnym sietak u małych haradach mohuć stać nievialikija pryvatnyja kramy. Biznesu prapanujuć pracavać na tych ža lhotnych padatkovych umovach, što i ahrasiadzibam - za adnu bazavuju ŭ hod. Da 15 krasavika MARH padrychtuje adpaviedny prajekt prezydenckaha ŭkazu.
— Havorka idzie pra toje, kab pryraŭniać ŭmovy viadzieńnia biźniesu ŭ handli i hramadskim charčavańni dla mikraarhanizacyj da ŭmoŭ viadzieńnia biźniesu ŭ śfiery ahraekaturyzmu. Heta vyrašaje pytańnie zaniataści, stvareńnia novych pracoŭnych miescaŭ, a taksama inicyjatyvy na miescach, - patłumačyŭ Uładzimir Kałtovič.
