Biełaruski internet-časopis Kyky.org uniesieny ŭ rasiejski rejestar sajtaŭ z zabaronienaj da raspaŭsiudu infarmacyjaj. List pra heta redakcyja atrymała 10 krasavika, paviedamlaje Radyjo Svaboda.
Pryčynaj staŭ artykuł 2014 hodu «Ludi, kotoryje vorujut odieždu v mahazinach», dzie apisvałasia sytuacyja z kradziažom adzieńnia, u tym liku ŭ Rasiei. Kali redakcyja nia vydalić hety artykuł abo nie abmiažuje da jaho dostup u Rasiei ciaham 24 hadzin, sajt budzie zablakavany na terytoryi Rasiei.
Što mienavita zabaronienaha ŭ artykule, nie paviedamlajecca. Rašeńnie pryniaŭ Zavodaŭkoŭski sud Ciumienskaj vobłaści, viadomy svaim rašeńniem ab zabaronie instrukcyi da videahulni Minecraft, bo tam nibyta źmiaščajecca recept vybuchoŭki (skłaści piać virtualnych blokaŭ porachu i čatyry — piasku).
Letaś toj samy sud zabaraniaŭ sajt ź instrukcyjaj dla achoŭnikaŭ kramaŭ, jak supraćstajać kradziažam.
Redakcyja Kyky.org pryniała rašeńnie vydalić artykuł, bo dola naviedvańniaŭ sajtu z Rasiei składaje 14%. Ale jahonaja kopija ŭžo była zaarchivavanaja ŭ kešy Google i na servisie Archive.is.
U siaredzinie 2015 hodu Ministerstva infarmacyi Biełarusi časova zablakavała dostup da sajtu kyky.org. Padstavaj staŭ materyjał Alaksandra Knyroviča (jaki ad studzienia znachodzicca, mierkavana, u SIZA KDB, u čym abvinavačvajecca — nieviadoma) pra značeńnie Dnia Pieramohi dla biełarusaŭ.
