U zamožnych krainach latarejaj cikaviacca najpierš nižejšyja słai hramadztva, bahatyja lišni raz padumajuć, ci ryzykavać navat adnym eŭra, majučy šanc 1:1000. U nas za ŭdačaj haniajucca i aśpiranty, i milicyjanty.
Ažyjataž vakoł latarej i ich kolkaść pravakujuć pytańni: chto za ŭsim staić, kudy iduć atrymanyja ad prodažu srodki i, samaje hałoŭnaje: ci varta hulać ź dziaržavaj u azartnyja hulni?
Arhanizacyjaj latarej — hrašova-rečavych, imhniennych, ličbavych — zajmajecca RUP «Biełaruskija laterei», zasnavanaje prezydenckim dekretam №6, što maje ŭ kožnaj vobłaści daččynuju filiju. Kali tyražnyja laterei jašče dajuć nadzieju raptam razbahacieć, to imhniennaja ŭdača naściarožvaje. Taki kvitok maje seryjny numar i dva zamalavanyja farbaj sektary: adzin — ź imaviernym vyjhryšam, a čaściej paviedamleńniem «Pasprabuj jašče», druhi ścirajecca ŭ prysutnaści specyjalnaj kamisii. I tut uźnikaje pytańnie: što zrabili ŭ pieršuju čarhu — nanieśli na vaš bilet, ź jakoha vy spadziavalisia atrymać 5 młn, farbu ci vybili seryjny numar?
Pryzavy fond latarej — 45—50%. Adny ź ich prynosiać dziaržavie 20 młn rubloŭ («Na skryžavańniach Eŭropy»), druhija («Vaša lato») — 250 młn u adnym rozyhryšy. Pavodle słovaŭ arhanizataraŭ, prybytki nakiroŭvajucca na finansavańnie fizkultury i sportu, likvidacyju vynikaŭ stychijnych biedztvaŭ, akazańnie dapamohi małazabiaśpiečanym hramadzianam, achovu navakolnaha asiarodździa, pomnikaŭ historyi, a taksama inšyja mety, jakija vyznačajucca dekretami i ŭkazami prezydenta. Asablivaść nacyjanalnaj latarei, akramia pamieraŭ pryzoŭ, u tym, što jana robicca adnoj z krynic papaŭnieńnia biudžetu, jaki nielha prakantralavać. A niedavier padahravajecca masavymi vypadkami dobraachvotna-prymusovaha raspaŭsiudžvańnia latarejnych biletaŭ na pradpryjemstvach. Dziaržava, u asobie arhanizataraŭ latarei, i nie chavaje svaich metaŭ i staŭleńnia da svaich hramadzianaŭ: «Niesumnienna adno: latareja — heta mahčymaść choć na imhnieńnie vyzvalicca ad štodzionnych turbot, paddaŭšysia całkam biaskryŭdnym maram pra lepšaje žyćcio, a šmat dla kaho hetyja mary pieratvarajucca ŭ realnaść…»
Udačy!
