Były kandydat u prezidenty i palitviazień Mikałaj Statkievič padzialiŭsia svaimi płanami na najbližejšy čas. Palityk admianiaje vuličnuju akcyju 9 Maja, adnak zaklikaje ludziej prychodzić u centr Minska na 3 Lipienia.

«Płanujem tolki tradycyjnuju našu akcyju 8 maja, u dzień, kali skončyłasia Druhaja suśvietnaja vajna ŭ Jeŭropie. Heta akcyja pravodzicca ad 1992 hoda, spačatku — Biełaruskim zhurtavańniem vajskoŭcaŭ, potym — «Narodnaj hramadoj». A 12:00 my źbirajemsia kala hałoŭnaha ŭvachoda Vajskovych mohiłak, idziem z kvietkami da mahił vyzvalicielaŭ.

9 Maja my papiarednie abviaščali akcyju. Jana ŭ nas razhladałasia jak reziervnaja, kali b 1 Maja nam nie dali pravieści šeście ŭ centry Minska. Pa vyzvaleńni ja źviazaŭsia z kalehami pa BNK, jakija jašče na voli, i my vyrašyli, što vielmi mała času, kab raskrucić hetuju datu. My b chacieli, kab na viesnavym etapie pratestaŭ była pastaŭlenaja hodnaja kropka, kab my zachavali za saboj Płošču. I heta było zroblena 1 Maja, ludzi viarnulisia ŭ centr Minska, my prymusili ŭładu heta vytrymać.

Navošta ciapier čaścić, kali ŭsio prajšło hodna?

Ja liču heta pieramohaj dla budučych bolš masavych pratestaŭ. Ułada ŭsio adno budzie vyhaniać ludziej na vulicy svajoj palitykaj, adsutnaściu reformaŭ, źnižeńniem uzroŭniu žyćcia. Vielmi važna, kab start novych pratestaŭ adbyvaŭsia mienavita z centra.

Heta našyja śviaty taksama: i 1 Maja, i 9 Maja, i 3 Lipienia. Dźvie apošnija daty — heta śviaty pieramohi nad niamieckim fašyzmam, nad hitleryzmam. I čamuści ŭłada zachapiła sabie hetyja daty, my pavinny viarnuć ich sabie.

Što tyčycca 3 Lipienia, to tak atrymałasia, što panujučy režym spaskudziŭ dva śviaty adnačasova — i dzień vyzvaleńnia, i Dzień Niezaležnaści. Tamu i pačniem z 3 Lipienia, płanujem u hety dzień praviadzieńnie akcyi. Tema vyzvaleńnia siońnia znoŭ aktualnaja. Vielmi admietna, što pierad Dniom Voli amapaŭcy chadzili pa Minsku ź niamieckimi aŭtamatami.

Akcyja na 3 Lipienia adbudziecca za niekalki dzion da praviadzieńnia Parłamienckaj asamblei ABSIE, jakaja budzie prachodzić u Minsku 7 lipienia. Heta budzie stvarać dadatkovuju nahruzku. Albo ŭłada pakaža pierad usioj Jeŭropaj, što jana ź siabie ŭjaŭlaje, albo niachaj tryvajuć.

My budziem jašče abmiarkoŭvać farmat akcyi 3 Lipienia. U mianie jość peŭnyja idei, ale pakul rana pra ich havaryć. Jość roznyja varyjanty pa časie i farmacie, ale ŭsio heta budzie tolki ŭ centry Minska. Druhaja chvala pratestaŭ, bolš mahutnaja, niepaźbiežnaja. Taksama 3 Lipienia — heta maralnaja data. U mianie na toj vajnie zabili dzieda za suviazi z partyzanami, zahinuŭ brat baćki na froncie. My majem prava na pratest.

Ciažka niejak supraćstajać previentyŭnym zatrymańniam. Chiba treba dadać bolš publičnaści. Pierad 3 Lipienia, vidać, daviadziecca ŭ režymie «stryma» ŭvieś čas chadzić, pastajanna zdymać usio na smartfon. Chacia mohuć i ŭ efiry zabrać.

Ale najlepšaja abarona — heta toje, što było 1 Maja. Chacia mianie jak arhanizatara zatrymali, adnak ludzi ŭsio adno vyjšli. Inšyja lidary BNK, a taksama Pavieł Sieviaryniec uziali na siabie adkaznaść. Maja pavaha i pašana da hetych ludziej».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?