Hrymiać jašče abmierkavańni prafiesijnaści milicyjanieraŭ i słužby achovy mietrapalitena padčas zatrymańnia bujnaha chłopca ŭ mietro. I adna z takich sprečak adznačyłasia tym, što ŭ joj uziaŭ udzieł kiraŭnik pres-słužby MUS Kanstancin Šalkievič. 

Jon zarubiŭsia z Antonam Matolkam pad adnym z dopisaŭ u fejsbuku, nazyvajučy błohiera to «małyšom», to «dziaŭčynkaj». 

Pačałosia ŭsio na staroncy pałkoŭnika Ihara Parmona — Matolka spytaŭsia, da jakoha viedamstva naležać achoŭniki mietro. 

Ciaham abmierkavańnia ŭ kamientach źjaviŭsia Kanstancin Šalkievič, napisaŭšy «O, jašče adzin profi źjaviŭsia… Čas iści pa pop-korn». 

Paśla hradus palemiki tolki pavyšaŭsia: Matolka nazvaŭ imidž milicyi admoŭnym, na što atrymaŭ adkaz, što mierkavańnie adnaho čałavieka, jaki ličyć siabie fatohrafam, nie adlustroŭvaje ahulnaj situacyi. 

Dalej pikiroŭka vyliłasia ŭ abrazy. 

«Ja nahadaŭ, što Šalkievič — supracoŭnik dziaržaŭnaha viedamstva, jakoje funkcyjanuje na našyja padatki. Nu i nahadaŭ, što heta internet — tut i na…j pasłać mohuć», — skazaŭ nam Matolka. 

Taki namiok na abrazu vyklikaŭ šał u Šalkieviča. 

Jon napisaŭ, što «dziaŭčynka pakryŭdziłasia» i što «małyš moža pasłać tolki ŭ internecie». 

Błohier zrabiŭ skrynšoty i vykłaŭ ich na svajoj staroncy. 

https://www.facebook.com/AntonMotolko/posts/10155305709181308?pnref=story

Šalkievič adreahavaŭ nastupnaj frazaj: 

«Anton, pa zaviadzioncy, nie daŭ połnaj karciny. I nie vykłaŭ svoj post. A za takoje mordu bjuć. Praŭda, nie dziaŭčatam, kaniečnie. Tut, u natoŭpie jahonych prychilnikaŭ, ja, kaniečnie, nie bajec. Ale ŭ inšaj halincy jon bajaźliva źliŭsia, vyrvaŭ słovy z kanteksty i zapościŭ tut. Usio heta, kaniečnie, hniusna. Ale jak jość».

Kamientatary pa-roznamu aceńvajuć reakcyju pres-sakratara na Matolku, jak i słovy taho pra «na…j pasłać mohuć». 

Što da kankretna hetaj frazy, to Anton skazaŭ nam, što «jana adrasavałasia Šalkieviču, ale kankretna jaho ja nie pasyłaŭ». 

Apieratyŭna źviazacca z Šalkievičam pa kamientar u nas nie atrymałasia.

Pra jaho pazicyju možna mierkavać pa paviedamleńni, jakoje milicyjanier pakinuŭ u internecie.

«Reakcyja była nie na situacyju. Tut jakraz usio narmalna. A na chamski dopis Antona Matolki, jaki jon nie choča vykładać. I adznaču, što ja tut pišu jak pryvatnaja asoba. Moj akaŭnt nijakaj pryviazki da MUS nie maje. Prosta, prajhraŭšy ŭ mužčynskaj sprečcy, Anton usio pieravioŭ na svaju zvykłuju baraćbu ź sistemaj. Ale heta tut ni pry čym», — napisaŭ Šalkievič. 

Клас
Панылы сорам
Ха-ха
Ого
Сумна
Абуральна