U novym navučalnym hodzie paśla pieršaha siemiestra ŭ Minskim dziaržaŭnym linhvistyčnym univiersitecie (MDŁU) źjavicca fakultet kitajskaj movy i kultury. Pra heta BIEŁTA paviedamiła rektar MDŁU Natalla Baranava.

Płanujecca, što fakultet prymie amal 300 studentaŭ. «My daŭno rychtavalisia da adkryćcia, i ŭ nas užo jość vykładčyki. Ciapier navučańnie kitajskaj movie viadziecca na troch adździaleńniach roznych fakultetaŭ univiersiteta, ciapier jany buduć abjadnanyja ŭ adzin», — raspaviała Natalla Baranava. Miarkujecca, što buduć funkcyjanavać dźvie kafiedry: teoryi i praktyki kitajskaj movy, a taksama movaznaŭstva i prafiesijnaj kamunikacyi na kitajskaj movie.

Na novym fakultecie buduć rychtavać vykładčykaŭ, pierakładčykaŭ i śpiecyjalistaŭ pa mižkulturnaj kamunikacyi ŭ śfiery źniešnieekanamičnych suviaziaŭ, suviaziaŭ z hramadskaściu i mižnarodnaha turyzmu. Akramia taho, atrymaje raźvićcio infarmacyjna-analityčny kirunak, dziakujučy jakomu studenty buduć vučycca afarmlać partały i sajty na kitajskaj movie.

U budučyni na bazie fakulteta vyrašana taksama adkryć navukova-daśledčyja łabaratoryi i centry. «U bližejšyja piać hadoŭ my chočam stvaryć łabaratoryju pierakładčyckaha majsterstva, centr moŭnaj padtrymki veb-sajtaŭ i centr biełaruska-kitajskaj supastaŭlalnaj linhvakulturałohii i etnahrafii», — dadała rektar.

Jak adznačyła Natalla Baranava, stvareńnie fakulteta źviazanaje ź nieabchodnaściu pavyšeńnia jakaści vałodańnia zamiežnaj movaj roznymi katehoryjami prafiesijanałaŭ. Patrebnyja vysokakvalifikavanyja nastaŭniki kitajskaj movy ŭ sistemie ahulnaj siaredniaj adukacyi i vykładčyki ŭ sistemie vyšejšaj i siaredniaj śpiecyjalnaj adukacyi. «Pašyrajucca kantakty z samymi roznymi arhanizacyjami Kitaja pa ŭsich kirunkach u ekanamičnaj śfiery, śfiery mastactva, kultury, turyzmu, tamu buduć zapatrabavanyja pierakładčyki», — kanstatavała jana.

«Studenty, jakija pryjduć tudy vučycca, buduć atrymlivać jakasnuju adukacyju. Jana budzie zabiaśpiečvacca nami razam z Uschodnie-kitajskim univiersitetam u Šanchai, univiersitetami zamiežnych moŭ u Piekinie i Ciańczini. Jany buduć z nami supracoŭničać i dapamahać kadrami, pakul my raściem jak maładaja navukova-mietadyčna škoła kitajskaj movy», — padsumavała kiraŭnik MDŁU.

Клас
0
Панылы сорам
0
Ха-ха
0
Ого
0
Сумна
0
Абуральна
0