Sajuz biełaruskich piśmieńnikaŭ pryniaŭ ekstranuju zajavu z nahody pazbaŭleńnia licenzii advakatki Hanny Bachcinoj.

«Siońnia, 12 vieraśnia, kvalifikacyjnaja kamisija Ministerstva justycyi Respubliki Biełaruś pazbaviła advakackaj licenzii viadomuju pravaabaroncu, adnu z najlepšych biełaruskich jurystak Hannu Viktaraŭnu Bachcinu. U dačynieńni da jaje była vykarystana farmuloŭka «niedastatkovaja prafiesijnaja kvalifikacyja», — adznačajecca ŭ zajavie Sakrataryjata Sajuza biełaruskich piśmieńnikaŭ. — Siabry našaha tvorčaha abjadnańnia doŭhija hady viedajuć Hannu Viktaraŭnu jak čałavieka ŭzornych prafiesijanalizmu, talentu i mužnaści. Jana hodna pradstaŭlała intaresy našaha starejšaha hramadskaha abjadnańnia ŭ pracesach Viarchoŭnaha suda, bliskuča adstojvała i adstojvaje ŭ našaj krainie pastułaty praŭdy i spraviadlivaści.

Dziakujučy jaje advakackamu majsterstvu i niepachisnaj prafiesijnaj pazicyi ŭ 2007 hodzie Sajuz biełaruskich piśmieńnikaŭ, adziny ź niekalkich sotniaŭ likvidavanych hramadskich abjadnańniaŭ Biełarusi, zdoleŭ zachavać aficyjny status. U 2010 hodzie Hanna Bachcina atrymała Hanarovuju Hramatu Ministerstva RB justycyi za dobrasumlennuju pracu ŭ orhanach justycyi pa abaronie pravoŭ i svabodaŭ hramadzian. U apošnija hady Hanna Viktaraŭna paśpiachova viała rezanansnyja spravy Iryny Chalip, Illi Vałavika, Eduarda Palčysa.

Ličym, što pazbaŭleńnie Hanny Bachcinoj prava na advakackuju praktyku źjaŭlajecca palityčna matyvavanym rašeńniem biełaruskich uładaŭ, źviazanym z abaronaj Mirasłava Łazoŭskaha, adnaho z klučavych fihurantaŭ samaj hučnaj palityčnaj spravy apošniaha času — «Spravy patryjotaŭ».

Rašuča zaklikajem Ministerstva justycyi pierahledzieć pryniataje rašeńnie ŭ dačynieńni da adnaho ź lepšych u našaj krainie abaroncaŭ pravoŭ i svabodaŭ hramadzian».

Клас
Панылы сорам
Ха-ха
Ого
Сумна
Абуральна