Da 2 śniežnia Bohdan Paškoŭski pavinien byŭ padpisać rašeńnie pra los vulicy Branisłava Taraškieviča ŭ Bielsku Padlaskim. Taki krajni termin praduhledžvaje polski Zakon ab dekamunizacyi. Jak paviedamiŭ Svabodzie radnik vajavody Roman Čepe, dakument dahetul nie padpisany.

«Vajavoda vyrašyŭ pakul prypynić hetuju praceduru, pakolki historyki Instytutu nacyjanalnaj pamiaci da hetaha času nie dasłali svaju charaktarystyku asoby Taraškieviča», — havoryć Čepe.

Praces pa dekamunizacyi ŭ Polščy kaardynuje Instytut nacyjanalnaj pamiaci. Hrupaj, jakaja aceńvaje bijahrafii patronaŭ polskich vulic i płoščaŭ, kiruje doktar histaryčnych navuk Maciej Korkuć. U interviju Svabodzie 15 listapada doktar Korkuć zajaviŭ, što Branisłaŭ Taraškievič byŭ kamunistam i traplaje pad zakon ab dekamunizacyi. Padobny los čakaŭ i vulicu Jakuba Kołasa ŭ Hajnaŭcy. Siońnia Svabodzie pakul nie ŭdałosia skantaktavacca z Korkuciem.

Radnik padlaskaha vajavody patłumačyŭ, što data 2 śniežnia chacia i zapisanaja ŭ zakonie, ale dazvalaje vajavodam adterminoŭvać pryniaćcie rašeńnia z ulikam peŭnych abstavinaŭ.

«Zrazumieła, što sprava Taraškieviča składanaja. My nia chočam śpiašacca, bo važna, kab heta było ŭzvažanaje rašeńnie, padmacavanaje hruntoŭnym analizam historykaŭ» — patłumačyŭ Roman Čepe.

14 listapada Čepe zajaviŭ, što vajavoda hatovy padpisać rašeńnie ab pierajmienavańni, pakolki vulica Taraškieviča była ŭ śpisie varšaŭskaha adździełu INP. Ale za Branisłava Taraškieviča zastupiŭsia biełastocki adździeł INP, i jaho sprava była nakiravanaja na dadatkovy analiz historykaŭ.

U polskim zakonie ab dekamunizacyi havorycca, što «nazvy budovaŭ, abjektaŭ i hramadzkich ustanovaŭ, u tym liku darohaŭ, vulicaŭ, mastoŭ i płoščaŭ, jakija nazvanyja adzinkami miascovaha samakiravańnia, nia mohuć ušanoŭvać asobaŭ, arhanizacyjaŭ, padziejaŭ abo dataŭ, jakija symbalizujuć kamunizm abo inšy tatalitarny ład».

Клас
Панылы сорам
Ха-ха
Ого
Сумна
Абуральна