Biełaruska Hanna Huśkova zavajavała pieršy alimpijski miedal dla našaj krainy ŭ karejskim Pchiončchanie. «NN» sabrała cikavyja fakty pra spartsmienku.
U frystajle ź siami hadoŭ
Hańnie Huśkovaj 25 hadoŭ, jana rodam ź Minska. Baćka pryvioŭ jaje zajmacca hetym pryhožym vidam sportu, kali dziaŭčyncy było ŭsiaho tolki siem hadoŭ. Kaža, što spadabałasia adrazu, bo z małych hadoŭ była hareźlivaj. Praz dva hady ŭpieršyniu stała na łyžy. Hanna raskazvaje, što jany byli ŭ dva razy daŭžejšymi za jaje samu.
Baicca vyšyni
Huśkova robić fantastyčnyja skački z łyžami ŭ pavietry, pry hetym jana baicca… vyšyni. «U žyvacie tady stanovicca kazytna, nie mahu hladzieć uniz z vysokich budynkaŭ». A voś vystupać najbolš lubić u ciomny čas sutak, kali nad placoŭkaj uklučanaje elektryčnaje aśviatleńnie, a nie pry naturalnym śviatle.
Byli ciažkija traŭmy
Jašče ŭ maładyja hady Hanna Huśkova pieraniesła vielmi składanuju traŭmu — razryŭ piaredniaj kryžapadobnaj źviazki. Padčas apieracyi ŭ kalena ŭkručvali tytanavyja šurupy. Spartsmienka kaža, što samaje składanaje navat nie sama traŭma, a psichałahična adyści ad jaje. «Chadziła na reabilitacyju, čytała knihi, hladzieła televizar», — tak jana raskazvaje pra hety pieryjad. Kali viarnułasia, to bajałasia, što kalena prosta «raźlacicca» pry pieršym ža skačku, ale ŭsio abyšłosia.
Ciažkaja traŭma była ŭ Huśkovaj padčas minułaha siezona. Pry adnym z pryziamleńniaŭ Hanna parvała mienisk, u vyniku daviałosia prapuścić amal ceły siezon. Frystajł — heta taki vid sporta, dzie prajści ŭsiu karjeru biez mocnych paškodžańniaŭ amal niemahčyma.
Duchoŭnym baćkam ličyć Dźmitryja Daščynskaha
«Jon mnie jak starejšy brat», — kaža Huśkova. Maŭlaŭ, zaŭsiody moža padyści da Daščynskaha z paradaj. Vychodzić, što vučanica pieraŭzyšła nastaŭnika. Dźmitryj Daščynski dvojčy traplaŭ na alimpijski pjedestał. U Nahana jon byŭ trecim, a ŭ Turynie — druhim. A voś Huśkova ŭzyšła na samuju vysokuju alimpijskuju prystupku.
«Na treniroŭkach mianie padhaniać nie treba, a voś u žyćci časta byvaje, što žyvu, jak u kosmasie, adnym dniom», — raskazvała čempijonka. Za piatnaccać siekund frystajlistka moža padciahnucca dziesiać razoŭ. Kaža, što hetaha vielmi mała. Padciahvajecca i z dadatkovaj vahoj (blin u 5-10 kiłahramaŭ).
Lubić tatuiroŭki, nie lubić dyskateki
Tatuiroŭki — heta adna z žarściaŭ alimpijskaj čempijonki. Jaje ruku ŭpryhožvaje vialikaja kvietka, na pravaj — taksama kvietka z drapiežnaj pumaj. Na klučycy ŭ jaje vybity žyćciovy deviz na łatyni Provehito in Altum — «imknisia ŭvyšyniu». Pieršaje tatu jana zrabiła ŭ 17 hadoŭ.
A voś načnyja kłuby Hanna Huśkova nie nadta šanuje. Kaža, što była litaralna niekalki razoŭ «za kampaniju». U volny čas byvaje šyje adzieńnie. Čuła pra toje, što Śviatłana Aleksijevič atrymała Nobieleŭskuju premiju, ale knihi łaŭreata nie čytała.