U Niaśvižskim kaściole Božaha cieła padtapiła padziemnuju radavuju pachavalniu kniazioŭ Radziviłaŭ. Pra heta TUT.BY paviedamili parafijanie i paćvierdziŭ probašč Piotr Šarko. Pavodle jaho, vada pačała pastupać u kryptu ŭ sieradu, 7 sakavika.
Krypta Radziviłaŭ u Niaśvižskim kaściole. Fota: niasvizh-kasciol.by
U sklepie znachodzicca bolš za 70 trunaŭ z pareštkami Radziviłaŭ. Niekalki hadoŭ tamu ich padniali ź ziamli na dubovyja pamosty, tamu pachavańniam ničoha nie pahražaje. Tym nie mienš, ścieny nabirajucca vilhaćciu, što kiepska dla ŭsiaho budynka.
Za niekalki hadzin vada padniałasia na niekalki santymietraŭ. Spačatku jaje vynosili viodrami, potym supracoŭniki adździeła kultury miascovaha rajvykankama prynieśli šłanh i pompu. Vadu vypampoŭvajuć kožnyja try hadziny.
Probašč Piotr Šarko kaža, što pryčyna nie ŭ tałych vodach, bo kryptu pačało padtaplajuć jašče ŭ sieradu, kali na vulicy była minusavaja tempieratura. Jon miarkuje, što prablema kryjecca ŭ sistemie vodaadviadzieńnia.
U paniadziełak u kaścioł pavinny pryjechać restaŭratary dla vyznačeńnia pryčyn i pošuku vyrašeńnia prablemy.
Kaścioł Božaha cieła ŭ Niaśvižy uklučany ŭ śpis Suśvietnaj spadčyny JUNIESKA. Chram znachodzicca ŭ pracesie restaŭracyi.
