Biełarus Kirył Relich ranicaj 11 sakavika (pa minskim časie) razhromna (117:110, 118:109, 118:109) pieramoh kubinca Ranziesa Bartelemi i staŭ čempijonam śvietu ŭ pieršaj paŭsiaredniaj vazie (da 63,5 kh) pa viersii WBA.
Ci heta absalutnaje čempijonstva i lepš za jaho nikoha niama? Tłumačym.
U boksie jość čatyry asnoŭnyja fiederacyi: WBA (suśvietnaja baksiorskaja asacyjacyja), WBO (suśvietnaja baksiorskaja arhanizacyja), WBC (suśvietnaja baksiorskaja rada) i IBF (mižnarodnaja baksiorskaja fiederacyja). Astatnija nie majuć vahi.
Drabilisia fiederacyi pa roznych pryčynach: niedzie pryčynaj byli hrošy, niedzie — niedavier da kiraŭnictva.
Samaja starejšaja ź ich WBA, pa aŭtarytecie jana kankuruje z WBC, IBF i WBO iduć za imi.
Isnavańnie niekalkich fiederacyj nie źjaŭlajecca prablemaj, tamu što talenavitych baksioraŭ, jakija mahli b pretendavać na pojas, šmat. Kali b jana była adna, to ŭ čempijona prosta nie chapiła b sił adbivacca ad abaviazkovych pretendentaŭ na tytuł, a pretendenty paśpieli b pasivieć, pakul stali b tymi pretendentami, vyjaśniajučy pamiž saboj, chto varty zmahacca z adzinym čempijonam.
Ź inšaha boku tut i biźnies: źjaŭlajecca instytut absalutnaha čempijonstva, kali lepšyja bjucca pamiž saboj za abjadnańnie tytułaŭ. A heta dobra manietyzujecca.
Dyk a što možna skazać pra pojas WBA, jaki zavajavaŭ Relich?
Kirył Relich
Tut lepš skažuć proźviščy: taki samy pojas u toj ža samaj katehoryi ŭ svoj čas mieli takija zorki boksu jak Ryki Chatan i Kościa Cziu.
Mienavita pojas WBA Tajsan prajhraŭ Cholifiłdu, u chodzie «tryllera ŭ Manile» Muchamied Ali i Džo Frejzier asprečvali pojas WBA i WBC.
Pojasam WBA ŭ svoj čas vałodali ci zmahalisia za jaho takija baksiory, jak Šuhar Rej Robinsan, Roj Džons, Rokki Marčyjana, Tajsan Fjury, Uładzimir Kličko, Fłojd Mejuezier, Oskar De Ła Chojia, Hienadź Hałoŭkin, Saul Alvarez.
Vałodańnie tryma asnoŭnymi pajasami: WBA, WBC i IBF robić baksiora absalutnym čempijonam. Takich spartoŭcaŭ za ŭsiu historyju było ŭsiaho niekalki.
Ciapier u płanach Relicha abjadnać svoj pojas z pojasam IBF, a dalej zamachnucca na WBC i, mahčyma, stać absalutnym čempijonam, pieršym u historyi Biełarusi: pojasam IBF taksama ad 11 sakavika vałodaje Majki Harsija (5 miesca ŭ rejtynhu lepšych baksioraŭ u niezaležnaści ad vahavaj katehoryi), tak što Relichu daviadziecca ciažka, ale i kubiniec Bartelemi da sustrečy ź im nie viedaŭ parazaŭ.
Tytuł u hetaj katehoryi pa viersii WBC na siońniašni momant vakantny.
