Daroha na avijabazu Kiortyn, pobač ź jakoj Ukraina prapanuje pabudavać kasmadrom.
Jak zajaviŭ ukrainski pasoł u Aŭstralii Mikałaj Kulinič, u krainy jość «vialiki dośvied u hłabalnaj kaśmičnaj honcy».
«Hetaja prapanova vielmi realistyčna. Ukraina mahła b zapuskać rakiety ŭžo zaŭtra ranicaj, kali b była placoŭka. My prapanujem našych ludziej i našy ekśpiertnyja viedy, kali ŭ Aŭstralii jość ziamla, jakuju možna vykarystoŭvać», — skazaŭ Kulinič.
Pa dadzienych kaśmičnaha ahienctva, dla stvareńnia kasmadroma nieabchodny ŭčastak ad piaci da siami tysiač kvadratnych kiłamietraŭ, pažadana niedaloka ad avijabazy Kiortyn na zachadzie Aŭstralii.
Papiaredniaje daśledavańnie mahčymaści budaŭnictva kasmadroma, pa dadzienych vydańnia, abyjdziecca ŭ 500 tysiač dalaraŭ. Jak paviedamiŭ Kulinič, ekanamičnaja acenka metazhodnaści budaŭnictva moža być padrychtavanaja na praciahu dvuch hadoŭ.
Na dumku dziaržaŭnaha kaśmičnaha ahienctva Ukrainy, kasmadrom moža stać hałoŭnaj startavaj placoŭkaj u Azii, jakaja zmahła b absłuhoŭvać kamiercyjnyja kaśmičnyja zapuski rehijanalnych partnioraŭ Aŭstralii, takich jak Japonija, Sinhapur, Paŭdniovaja Kareja i Indanezija.
U minułym hodzie Piatro Parašenka nazvaŭ svaju krainu paśpiachovaj kaśmičnaj dziaržavaj. Pavodle jaho słovaŭ, «mienavita ŭkrainskija rakiety-nośbity vyvodziać na kalaziamnuju arbitu» spadarožniki i kaśmičnyja aparaty krain z usiaho śvietu. U svaju čarhu, ekśpierty adznačali, što ŭkrainski kosmas jość spadčynaj Savieckaha Sajuza, z času raspadu jakoha halina bieśpierapynna dehraduje.
