Katalickija biskupy Biełarusi skiroŭvajuć da viernikaŭ Biełarusi tekst malitvy z nahody 100-hodździa abviaščeńnia Biełaruskaj Narodnaj Respubliki. 25 sakavika ŭ kaściołach buduć malicca za Biełaruś, paviedamlaje catholic.by.
Biskupy zaklikajuć śviataroŭ pamalicca razam ź viernikami słovami hetaj malitvy padčas usich nabaženstvaŭ 25 sakavika.
«Viadzi mianie ŭ praŭdzie Tvajoj i navučy, bo Ty Boh zbaŭleńnia majho, na Ciabie spadziajusia kožny dzień» (Ps 25(24), 5)
«Hłybokapavažanyja braty i siostry, suajčyńniki, usie ludzi dobraj voli! Siońnia, kali naša Baćkaŭščyna adznačaje sotyja ŭhodki abviaščeńnia Biełaruskaj Narodnaj Respubliki, hetyja słovy psalmista prosiacca na našyja vusny. Jany zaklikajuć da biaźmiežnaha davieru Bohu — adzinaj našaj nadziei», — havorycca ŭ zvarocie-malitvie.
«Abviaščeńnie Biełaruskaj Narodnaj Respubliki stała biesprecedentnym histaryčnym aktam i vielmi važnym krokam dziaržavatvorčaha pracesu, adkryŭšy šlach da niezaležnaści.
Minułaje stahodździe — heta čas šmatlikich vyprabavańniaŭ, vojnaŭ, pieraśledu viery. Heta taksama čas adradžeńnia našaj dziaržaŭnaści i duchoŭnaści.
Składanaja i trahičnaja historyja Biełarusi za apošniaje stahodździe była paznačana šmatlikimi śviedčańniami i mučanictvam za vieru, uvabrała ŭ siabie losy tych, chto niastomna pracavaŭ i nadalej pracuje na karyść Radzimy, ich słavu, mužnaść, achviarnaść i dasiahnieńni», — adznačajecca ŭ zvarocie.
«Usiemahutny i Miłaserny Boža, adary nas svajoju łaskaju i błahasłaŭleńniem, kab supolnymi namahańniami pad apiekaju Maryi my ŭsie razam budavali ščaślivaje zaŭtra našaj lubaj Baćkaŭščyny. Boža, błahasłavi Biełaruś!» — adznačajecca ŭ malitvie katalickich biskupaŭ.
