Kamisija pa spravach niepaŭnaletnich u Maładziečnie 27 sakavika zabrała sa šmatdzietnaj siamji dzieviać dziaciej, piša Jeŭraradyjo sa spasyłkaj na mlyn.by. Jak vyjaviłasia, maci z baćkam źbivali ich u pakarańnie za pravinnaści.
Małodšamu chłopčyku spoŭniłasia tolki paŭhoda, starejšamu — 13 hadoŭ. Dziakujučy jamu i stali viadomyja siamiejnyja noravy.
Chłopiec, jak i ŭsie starejšyja dzieci siamji, vučycca ŭ Radaškovickaj siaredniaj škole Maładziečanskaha rajona. 21 sakavika sacyjalny piedahoh Viktoryja Paźlevič zaŭvažyła siniaki ŭ jaho na ruce. Pra ich pachodžańnie chłopčyk raspavioŭ tolki na nastupny dzień. Chłopčyk raskazaŭ, što jaho i małodšych dziaciej źbivajuć baćki. A taksama, što mama abiacała syści razam ź imi da Boha — na Vialikdzień abo ŭ Vierbnuju niadzielu. I što da ŭsich ich pryjdzie śmierć.
Potym pra matčyny paboi raspaviali jaho małodšyja siostry. Bili baćki tolki starejšych šaściarych dziaciej. Tych, kamu ad paŭhoda da troch, pašancavała bolš. Piedahoh adrazu ž paviedamiła ŭ adździeł adukacyi rajvykankama, kamisiju pa spravach niepaŭnaletnich i ŭ milicyju.
Užo 22 sakavika padletka pieraviali ŭ sacyjalny prytułak pry Radaškovickaj škole-internacie. Dadomu iści jon bajaŭsia, kab baćki nie źbili za raspovied.
Na kamisii pa spravach niepaŭnaletnich 23 sakavika maci zajaviła, što dziaciej karaje nie jana, a Boh. A jana tolki vyznačaje kolkaść udaraŭ ramianiom. «Maŭlaŭ, biła i budu bić. Na pytańnie, što jana ličyć pravinaj i za što bje dziaciej, žančyna pryviała ŭ prykład vypadak, kali syn prahulaŭ zaniatki ŭ muzyčnaj škole, pra što jana daviedałasia ad piedahoha. I pakarała», — raspaviadaje namieśnica staršyni kamisii pa spravach niepaŭnaletnich Maładziečanskaha rajvykankama Volha Klepakova.
27 sakavika kamisija pa spravach niepaŭnaletnich pryniała rašeńnie zabrać dziaciej ź siamji.
Starejšy syn špitalizavany z padazreńniem na pnieŭmaniju, ź im pracuje dziciačy lekar-psichijatr. Troje samych maleńkich dziaciej taksama ŭ lakarni i nieŭzabavie adpraviacca ŭ UAZ «Barysaŭski dom dziciaci», bo sacyjalny prytułak pry Radaškovickaj škole-internacie prymaje dziaciej tolki ad troch hadoŭ. Astatnich šaściarych źmieściać u hetuju ŭstanovu.
Dziaciej mohuć viarnuć u siamju praz paŭhoda, kali buduć likvidavanyja pryčyny, jakija pryviali da takoj situacyi. Kali situacyju vypravić nie ŭdasca, baćkoŭ mohuć pazbavić baćkoŭskich pravoŭ, kaža Volha Klepakova.
Piedahohi kažuć, što siamja mieła tolki stanoŭčyja charaktarystyki.
Jaje haspadynia mieła Orden Maci, siamja pryčaščałasia ŭsim składam ŭ carkvie jevanhielskich chryścijanaŭ-baptystaŭ. Praŭda, niadaŭna pierastała jaje naviedvać. Što zdaryłasia z baćkami, skazać ciažka: na kantakt z pradstaŭnikami baptysckaj hramady jany nie iduć.
