U redakcyju «Našaj Nivy» źviarnulisia baćki, jakija žyvuć u Pieršamajskim rajonie Minska. Jany raskazali pra epapieju z arhanizacyjaj roznaŭzrostavaj biełaruskamoŭnaj hrupy ŭ dziciačym sadku — baćki bjucca ŭžo z paŭhoda, a rajonnaje ŭpraŭleńnie adukacyi tolki daje adpiski. 

Siarhiej Lisičonak, siabra inicyjatyŭnaj hrupy

Siarhiej Lisičonak, siabra inicyjatyŭnaj hrupy

«My arhanizavalisia ŭ sacyjalnych sietkach, sabrali baćkoŭ, jakija pieražyvajuć za toje, kab dzieci ŭ sadku sapraŭdy havaryli pa-biełarusku, — raskazaŭ «Našaj Nivie» Siarhiej Lisičonak, adzin z ruchavikoŭ pracesu. — My vyrašyli, što budziem prasić stvaryć roznaŭzrostavuju dziciačuju hrupu, dzie ŭvieś vychavaŭčy praces vioŭsia b na adnoj movie. Bo standartnaja prablema hetak zvanych «biełaruskamoŭnych» hrup u sadkach, što tam ź biełaruskaha — tolki šylda. Ni dzieci, ni vychavacieli pa-biełarusku tam nie havorać. Nie chaciełasia addavać im biełaruskamoŭnaje dzicia, a nazad atrymlivać ruskamoŭnaje. Tamu my sabralisia — 23 siamji, sabrali podpisy i pieradali va ŭpraŭleńnie adukacyi». 

Dalej, kaža Lisičonak, ich pačali «muryžyć». 

«Načalnica adździeła adukacyi Pieršamajskaha rajona Ludmiła Barysienka pačała zajmacca moŭnaj ekvilibrystykaj: kaža, maŭlaŭ, vy chočacie tym samym parušyć prava ruskamoŭnych dziaciej na adukacyju? Heta śmiešna ŭsio. Pa vyniku adkaz byŭ nastupny: «Addavajcie, jak usie», — skazaŭ baćka. 

Ludmiła Barysienka, načalnica adździeła adukacyi Pieršamajskaha rajona Minska, fota minsk.edu.by

Ludmiła Barysienka, načalnica adździeła adukacyi Pieršamajskaha rajona Minska, fota minsk.edu.by

Darečy, admietny nastupny fakt — tolki ŭ hetym rajonie dziejničaje šeść ruskamoŭnych roznaŭzrostavych hrup. 

Što zaminała Barysiency razhladzieć zvarot na karyść baćkoŭ i stvaryć jašče adnu hrupu? 

Na hetaje pytańnie adkaz nieviadomy — ciaham tydnia «Naša Niva» sprabavała dazvanicca da Ludmiły Barysienka, ale na pracoŭnym miescy hetaja čynoŭnica adsutničała ad ranicy i da viečara. 

Zatoje 9 krasavika baćkam pryjšoŭ užo aficyjny list ad Barysienki, u jakim jana piša: 

«Upraŭleńnie adukacyi nie maje mahčymaści dadatkova adkryć roznaŭzrostavuju hrupu. Upraŭleńnie prapanuje baćkam, jakija vykazali žadańnie adkryć roznaŭzrostavuju hrupu, zaličyć svaich dziaciej u biełaruskamoŭnyja hrupy ŭstanoŭ daškolnaj adukacyi», — značycca ŭ jaje adkazie.

Baćkoŭ taki adkaz aburyŭ, jany paličyli heta naśmieškaj ź siabie i buduć abskardžvać rašeńnie ŭ vyšejšych instancyjach. 

«Kali ja pieršy raz pryjšła da śpiecyjalistaŭ pa daškolnaj adukacyi, mnie skazali, što stvaryć hrupu nie prablema, sprava tolki ŭ adsutnaści achvotnych vychoŭvać dziaciej pa-biełarusku. A kali achvotnyja znajšlisia, nam prosta admovili, — skazała «Našaj Nivie» Volha Kavalčuk, jašče adna maci z hrupy padpisantaŭ. — Nam nie dajuć mahčymaści pajści ŭ adnu hrupu. Naprykład, u nas jeść 8 dziaciej adnaho ŭzrostu, my chočam atrymać nakiravańnie ŭ adnu hrupu, kab u dziaciej było choć niejkaje biełaruskamoŭnaje asiarodździe, i navat heta zrabić niemahčyma! Bo ŭ tyja biełaruskamoŭnyja hrupy, što farmirujucca na 1 vieraśnia 2018 hoda, jakija nam prapanujuć, całkam pierachodziać dzieci ź jaślaŭ i dzieci z ahulnaj čarhi. Faktyčna prablema ihnarujecca». 

«Naša Niva» źviarnułasia ŭ Ministerstva adukacyi z prośbaj patłumačyć situacyju. 

Pres-sakratar viedamstva Ludmiła Vysockaja spačatku skazała, što kanflikt vyčarpany: maŭlaŭ, baćkam ža prapanavali addać dziaciej u biełaruskamoŭnyja hrupy.

Tady my ŭdakładnili, u čym prablema stvaryć roznaŭzrostavuju hrupu, jak taho prosiać baćki, kali tolki ŭ hetym rajonie dziejničajuć ažno šeść takich ža, ale ruskamoŭnych hrup. 

«Tady ja nie viedaju, čamu jany tak adkazali. Viedaju, što prablem niama, kab stvaryć hetyja hrupy. Našaja pazicyja takaja: nijakich prablem stvaryć takuju hrupu niama», — skazali ŭ Ministerstvie. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?