U Polščy na aŭtatrasie A2, jakaja złučaje Varšavu i Poznań, pierakuliłasia cysterna, na darohu vyciekła 24 tony vadkaha šakaładu. Zaraz ruch pa trasie pierakryty ŭ abodva baki, z-za čaho utvaryŭsia hihancki zator. Kiroŭcam rekamiendujuć karystacca inšymi aŭtadarohami.

Kiroŭca cysterny ŭrezaŭsia ŭ barjer, jaki padzialaje pałosy. Jaho sa złamanaj rukoj špitalizavali, a dla likvidacyi nastupstvaŭ avaryi prybyli supracoŭniki ekstrannych słužb. Vadki šakaład na adkrytym pavietry chutka zastyvaje, što ŭskładniaje jaho pryborku. Pažarnyja, jakija zajmajucca jaho zboram, navat śpiecyjalna prakansultavalisia z kandytarami.

«My źviazalisia z vytvorcam šakaładu. Razam my pahadzilisia z tym, što treba vykarystoŭvać myjnyja mašyny pad ciskam, ale heta zojmie niekatory čas. Chałodny šakaład horš za śnieh», — raspavioŭ bryhadzir pažarnych Bahdan Kavalski.

Pavodle jaho słoŭ, kiroŭcy da pryjezdu ratavalnikaŭ praciahvali ruch pa trasie i ŭ vyniku raźvieźli šakaład na niekalki kiłamietraŭ. Heta jašče macniej uskładniaje jaho pryborku.

Клас
0
Панылы сорам
0
Ха-ха
0
Ого
0
Сумна
0
Абуральна
0