Z 5 pa 8 maja ŭ lasach Vałynskaj vobłaści Ukrainy prajšła vajskova-spartovaja hulnia «Zvyciaha». U hetym hodzie ŭ joj pryniała ŭdzieł amal 300 čałaviek. Cikavinkaj hetaha hoda staŭ udzieł ŭ hulni patrulnych palicejskich.

Arhanizataram «Zvyciahi» źjaŭlajecca ŭsieŭkrainskaja moładzievaja arhanizacyja «Nacyjanalny Aljans».

Pa zaprašeńni Hramadskaha siektara Atrada «Pahonia» hulniu naviedali taksama i biełarusy.

«Zvyciaha» ŭznaŭlaje atmaśfieru vyzvalenčaha ruchu na Ukrainie padčas Druhoj suśvietnaj vajny i adbyłasia ŭžo ŭ trynaccaty raz u lasach, dzie i vajavali bajcy Ukrainskaj paŭstanckaj armii. 

Umovy hulni zastajucca tradycyjnymi: udzielniki padzialilisia na dźvie kamandy — sotni. Dalej kamandy abrali miesca «dysłakacyi», dzie pastavili svoj ściah. Meta kožnaj sotni była ŭ zachavańni svojho ściaha i zdabyćci ściaha voraha i ŭtrymańni jaho na praciahu čatyroch dzion. U takim vypadku heta rasceńvałasia b jak «čystaja pieramoha».

Dla hetaha sotnia pavinna była šukać łahier voraha i šturmavać jaho. «Zabivać» praciŭnikaŭ možna było šlacham zryvańnia ź ich paviazki, jakaja simvalizavała žyćcio. Pa kolkaści sarvanych paviazak vyznačaŭsia b vynik hulni, kali nivodnaj z kamand nie atrymałasia zachapić ściah supiernika i ŭtrymać jaho da kanca hulni. Pryčym, košt žyćcia nie va ŭsich byŭ adnolkavy: jon zaležyŭ ad ranha «zabitaha». 

U hetym hodzie abiedźvie kamandy zastalisia sa svaimi ściahami i vynik hulni byŭ vyznačany pa kolkaści sarvanych paviazak.

Клас
0
Панылы сорам
0
Ха-ха
0
Ого
0
Сумна
0
Абуральна
0