Biełaruskaje žury radykalna źmianiła acenku Eleni Furejra.
Stała viadomaja raskładka hałasoŭ ad Biełarusi na Jeŭrabačańni-2018. Husty žury i telehledačoŭ hetym razam radykalna razyšlisia.
Voś hałasavańnie žury:
1. Kipr — 12 bałaŭ
2. Aŭstryja — 10 bałaŭ
3. Narviehija — 8 bałaŭ
4. Ałbanija — 7 bałaŭ
5. Čechija — 6 bałaŭ
6. Litva — 5 bałaŭ
7. Słavienija — 4 bały
8. Danija — 3 bały
9. Aŭstralija — 2 bały
10. Šviecyja — 1 bał.
A voś telehledačy acanili kankursantaŭ nastupnym čynam:
1. Ukraina — 12 bałaŭ
2. Narviehija — 10 bałaŭ
3. Izrail — 8 bałaŭ
4. Danija — 7 bałaŭ
5. Małdova — 6 bałaŭ
6. Čechija — 5 bałaŭ
7. Italija — 4 bały
8. Kipr — 3 bały
9. Vienhryja — 2 bały
10. Bałharyja — 1 bał.
Admietna, što žury navat nie ŭzhadała Izrail, jaki na Jeŭrabačańni pieramoh.
Ale samaje pryšpilnaje nie heta.
Akazvajecca, što ŭ paŭfinale biełaruskaje žury nie dało Kipru nivodnaha bała. Heta značyć, kali b rašeńnie zaležała ad Biełarusi, to Kipr nie prajšoŭ by ŭ finał. Ale Kipr vyjšaŭ u nastupny etap, i, bolš za toje, bukmiekiery stali adzinadušna stavić na pieramohu haračych tancaŭ Eleni Furejra. I ŭ finale toje samaje žury tuju samuju pieśniu…. stavić na pieršaje miesca.
U paŭfinale biełarusy pastavili na pieršaje miesca Ałbaniju, jakaja vyjdzie ŭ finał i zojmie 11-je miesca. Na druhim u našych byŭ čech, jaki ŭ finale stanie 6-m, a na trecim i čaćviortym — Charvatyja i Isłandyja, jakija ŭ finał nie projduć. Akramia Kipra, našy dali nul bałaŭ i Litvie, choć Jeva Zasimaŭskajcie taksama ŭ finał vyjdzie i zojmie tam 12-je miesca.
Nahadajem, što ŭ finale nacyjanalnyja žury pakinuli kipryjotku na 5-m miescy, a telehledačy — na 2-m. Akramia Izraila, biełaruskaje žury pramarhała taksama niemca i švieda, jakija byli vysoka acenienyja inšymi prafiesijnymi žury. A, u adroźnieńnie ad masavaha hledača, u husty žury nie trapili ŭkrainiec Melovin i małdavanie z Prydniastroŭja DoReDos.
Raniej biełaruskaje žury vyklikała krytyku svaim rašeńniem pasłać na konkurs ukrainskaha śpievaka Alekseev-a. Jon u vyniku zaniaŭ miesca ŭ kancy svajho paŭfinału.
Novuju chvalu kpinaŭ vyklikali husty našaha žury ŭ finale.
«Biełaruskaje žury nie pastaviła pieramožcy Jeŭrabačańnia ź Izraila nivodnaha bała. I jany jašče chočuć pieramahać na konkursie, śmiech u rocie, kali nie ŭ stanie razhledzieć pieramožcu», — piša žurnalist Źmicier Pankaviec.
