Fota: gaibrest.by
Bryhady biełaruskich miedykaŭ ź Minska i Bresta vyjechali siońnia ranicaj u Kamianiecki rajon dla akazańnia dapamohi dzieciam, jakija paciarpieli ŭ avaryi na trasie «Kamianiec—Šarašova—Śvisłač», pieradaje pres-słužba Ministerstva achovy zdaroŭja.
U avaryi paciarpieli dzieci z ukrainskaj kamandy pa futbole. Adno dzicia zahinuła, jašče šaściora dziaciej ź ciažkimi traŭmami byli dastaŭleny ŭ Kamianieckuju centralnuju rajonnuju balnicu. Va ŭsich paciarpiełych dyjahnastavany čerapna-mazhavyja traŭmy roznaj stupieni ciažkaści, a taksama pierałomy i vyvichi. Adno dzicia znachodzicca ŭ ciažkim stanie i padłučana da aparata štučnaj vientylacyi lohkich.
Ministr achovy zdaroŭja Valeryj Małaška uziaŭ situacyju pad asabisty kantrol. «Lepšyja daktary Biełarusi i ŭsie nieabchodnyja materyjalna-techničnyja resursy zadziejničany dla akazańnia dapamohi paciarpiełym u avaryi dzieciam», — skazaŭ jon.
Z Bresta ŭ Kamianiec prybyła bryhada miedykaŭ. U jaje składzie — niejrachirurh, traŭmatołah, reanimatołah i inšyja śpiecyjalisty, a ź Minska ŭ Kamianiec — dziciačy traŭmatołah, niejrachirurh i dziciačy aniestezijołah-reanimatołah. U Brest nakiravaŭsia pieršy namieśnik ministra achovy zdaroŭja Dźmitryj Pinievič. Siońnia častku paciarpiełych dziaciej pieraviaduć u Bresckuju abłasnuju balnicu.
Avaryja adbyłasia siońnia, 13 maja, kala 7-j hadziny, na 54 kiłamietry aŭtadarohi R-98 la vioski Martyniuki, paviedamiła UDAI Bresckaj vobłaści.
Kiroŭca za rulom aŭtamabila «Reno Majstar» sutyknuŭsia z pahruzčykam Amkador, jakim kiravaŭ miascovy žychar. Zahinuŭ chłopčyk 2005 hoda naradžeńnia, hramadzianin Ukrainy, jaki znachodziŭsia na piarednim pasažyrskim siadzieńni.