Ułady Francyi adkaznyja za farmiravańnie pohladaŭ 20-hadovaha čačenca Chasana Azimava, jaki napaŭ z nažom na minakoŭ u centry Paryža, piša kiraŭnik Čačni Ramzan Kadyraŭ u svaim Telegram-kanale ŭ niadzielu, 13 maja.
Kadyraŭ paćvierdziŭ čačenskaje pachodžańnie złačynca. Kadyraŭ kaža pra jaho jak pra Chasana Azimava, tady jak francuzskija krynicy nazyvajuć inšaje imia — Chamzat Azimaŭ (Khamzat Azimov):
«Chasan Azimaŭ sapraŭdy ŭ 14-hadoŭ atrymaŭ pašpart hramadzianina Rasii. Adnak hety pašpart nie dziejničaje, bo ŭ 20 hadoŭ jon nie atrymaŭ novy. U suviazi z hetym liču nieabchodnym zajavić, što ŭsia adkaznaść za toje, što Chasan Azimaŭ ŭstaŭ na šlach złačynnaści, całkam kładziecca na ŭłady Francyi. U Čačni jon tolki naradziŭsia, a staleńnie, farmiravańnie jaho asoby, jaho pohladaŭ i pierakanańniaŭ adbyvałasia ŭ francuzskim hramadstvie», — skazaŭ jon.
«U takim vypadku ŭłady ŭsiu adkaznaść za budučyniu dziaciej biaruć na siabie, tamu i pavinny nieści hetuju adkaznaść», — dadaŭ Kadyraŭ.
«Pierakanany, kali b jon pravioŭ dziacinstva i junackija hady ŭ Čačni, los Chasana skłaŭsia b inakš!» — padsumavaŭ palityk.
Azimavu, pavodle telekanała France 2, u 2010 hodzie było nadadziena francuzskaje hramadzianstva, a naradziŭsia jon u 1997 hodzie u Čačni.
Napad u Paryžy jon ździejśniŭ uviečary 12 maja. U vyniku ataki adzin čałaviek zahinuŭ, jašče niekalki atrymali ranieńni. Złamyśnik byŭ zabity. Adkaznaść za incydent ŭziała na siabie terarystyčnaja hrupoŭka «Isłamskaja dziaržava».