Madernizacyja biełaruskich NPZ na košt paliva nie paŭpłyvaje. Zatoje na cenach moža adbicca rost suśvietnych kacirovak na naftu paśla vychadu ZŠA ź jadziernaj damovy ź Iranam. Pra heta ŭ efiry prahramy «Tydzień» na telekanale STB raspavioŭ staršynia kancerna «Biełnaftachim» Ihar Lašenka.
Surjoznych skačkoŭ cen na paliva ŭ Biełarusi nie płanujecca. U ahladnaj budučyni kancern praciahnie palityku «strymanaha rostu» koštu na ŭžo tradycyjnuju adnu kapiejku.
— Napeŭna, heta zamarudziła rost ekanamičnych pakazčykaŭ pradpryjemstvaŭ. Ale my pamiatajem pra našych spažyŭcoŭ, - rastłumačyŭ palityku Ihar Lašenka.
Zaraz praciahvajecca madernizacyja ajčynnych NPZ. Raboty pavinny skončycca ŭ listapadzie 2019 hoda. Jana pavysić ekanamičnuju efiektyŭnaść zavodaŭ, ale nie z-za pavyšeńnia koštu pradukcyi, a za košt pavieličeńnia hłybini pierapracoŭki syraviny.
- My susiedničajem z Rasijaj. Košt paliva ŭ ich i ŭ nas nie moža surjozna adroźnivacca. Tamu skazać, što jość pramaja zaležnaść pamiž madernizacyjaj i koštam paliva, nielha, - patłumačyŭ staršynia «Biełnaftachimu».
Zatoje košt paliva budzie pavialičvacca razam z rostam suśvietnych cenaŭ na naftu. Heta moža adbycca paśla vychadu ZŠA ź jadziernaj prahramy ź Iranam.
- Cana paliva praparcyjna budzie pavyšacca. My idziem sinchronna z našymi kalehami z Rasijskaj Fiederacyi, siońnia takaja stratehija. Tamu i tut budziem aryjentavacca na ich, - skazaŭ Ihar Lašenka.
