Baćki budučych pieršakłaśnikaŭ chočuć, kab ich dzieci vučylisia ŭ navučalnaj ustanovie ŭ centry horada. Letaś dapamahčy ŭ hetym im abiacała kiraŭnictva horada, tamu tady jany vyrašyli addać dziaciej u škołu na hod paźniej.
Svaje zajavy na stvareńnie biełaruskaha kłasa baćki piaciarych dziaciej zanieśli dyrektaru himnazii №4 jašče 13 krasavika. Administracyja himnazii tady nie była ŭpeŭniena ŭ mahčymaści adkryćcia biełaruskamoŭnaha kłasa, spasyłajučysia na toje, što dla niešmatlikaj hrupy va ŭstanovie niama pamiaškańnia, raskazała Intex-press Taćciana Małaščanka, maci adnoj z budučych pieršakłaśnikaŭ.
Dla vyrašeńnia prablemy inicyjatyŭnaja hrupa baćkoŭ, jakija žadajuć, kab ich dzieci navučalisia na rodnaj movie, 10 maja sustrełasia sa staršynioj Baranavickaha harvykankama Juryjem Hramakoŭskim. Na sustrečy taksama prysutničali Siarhiej Puzikaŭ, načalnik adździeła adukacyi, sportu i turyzmu Baranavickaha harvykankama, i Vadzim Ščarbakoŭ, dyrektar himnazii №4.
U vykankamie baćkam prapanavali adkryć taki kłas u SŠ №16. Adnak baćki vykazalisia suprać hetaha.
— Nas takaja prapanova nie zadavalniaje: škoła znachodzicca nie ŭ centry horada, tamu dabiracca da jaje dzieciam budzie niazručna. U minułym hodzie staršynia harvykankama paabiacaŭ nam dapamahčy adkryć biełaruskamoŭny kłas u himnazii №4, tamu my da apošniaha budziem sprabavać dabicca svajho, — kaža Taćciana Małaščanka.
Pa jaje słovach, sioleta ŭ himnazii №4 płanujecca nabrać čatyry pieršyja kłasy. Kab adzin ź ich byŭ biełaruskamoŭnym, treba sabrać 27 dziaciej.
16 maja ŭ himnazii №4 adbudziecca schod baćkoŭ pieršakłaśnikaŭ. Taćciana spadziajecca, što na schodzie inicyjatyŭnaja hrupa zmoža ŭhavaryć inšych baćkoŭ addać svaich dziaciej u biełaruskamoŭny kłas.
— My majem prava navučać dziaciej pa-biełarusku, ale čamuści zamiest padtrymki ŭładaŭ sutykajemsia tolki z prablemami, — kaža Taćciana Małaščanka.
U minułym hodzie baćki pieršakłaśnikaŭ užo sprabavali dabicca adkryćcia biełaruskamoŭnaha kłasa. Tady Siarhiej Puzikaŭ, načalnik adździeła adukacyi, sportu i turyzmu, prapanavaŭ im adkryć kłas u SŠ №13. Baćkoŭ hetaja prapanova nie zadavoliła, jany chacieli, kab kłas adkryli ŭ himnazii №4, tamu častka ź ich vyrašyła addać dziaciej u škołu na hod paźniej.
Ciapier u Baranavičach isnuje adziny biełaruskamoŭny kłas — u himnazii №4. U im vučacca čaćviora vaśmikłaśnikaŭ.
