U Italii papulisckija partyi «Ruch 5 zorak» i «Liha» vyłučyli na pasadu premjer-ministra kandydaturu prafiesara prava Džuzepe Konte, praktyčna nieviadomaha ŭ palitycy. Pra heta paviedamlaje vydańnie Politico.
«Konte budzie premjer-ministram palityčnaha ŭrada», — skazaŭ lidar «Ruchu 5 zorak» Łuidžy Dzi Majo paśla taho, jak unios kandydaturu Konte na razhlad prezidentu.
Konte pracavaŭ jak advakatam, tak i akademičnym prafiesaram, i jaho reziume ŭklučaje karotkija pieryjady vykładańnia va ŭniviersitetach Jela, Ńju-Jorka i Kiembrydža. Jon byŭ prapanavany ŭ jakaści mahčymaha ministra «Ruchu 5 zorak» napiaredadni vybaraŭ u sakaviku.
Konte źjaŭlajecca małaviadomym za miežami palityčnych kołaŭ Ryma i nie maje značnaha palityčnaha vopytu. Jaho charaktaryzujuć jak technakrata, što, pa śćviardžeńni krytykaŭ, supiarečyć pieradvybarnym łozunham abiedźviuch papulisckich partyj, jakija biaruć udzieł u farmiravańni kaalicyi.
Corriere della Sera, viadučaja štodzionnaja hazieta Italii, acharaktaryzavała Konte «jak ŭmieranaha i zbałansavanaha».