Archiŭnaje fota
Daičy Jošyda, jaki byŭ asudžany ŭ Biełarusi za nielehalnaje pieramiaščeńnie ahniastrelnaj zbroi, pakinuŭ kaloniju ŭ supravadžeńni supracoŭnikaŭ RUUS horadu Viciebsku.
Miarkujecca, što ciapier jaho dastaviać u miascovy adździeł hramadzianstva i mihracyi dla afarmleńnia dakumentaŭ. Takuju infarmacyju Radyjo Svaboda paviedamiła siamja mastaka. Pabačycca z rodnymi jon zmoža tolki ŭ aeraporcie pa darozie ŭ Japoniju, što adbudziecca nieŭzabavie.
4 traŭnia sudovaja kalehija Viarchoŭnaha sudu Biełarusi źmianiła prysud u kryminalnaj spravie hramadzianina Japonii Daičy Jošydy z pryčyny «praźmiernaj strohaści pryznačanaha pakarańnia».
Jak paviedamlajecca na sajcie Viarchoŭnaha sudu, sudovaja kalehija ŭ kryminalnych spravach razhledzieła na adkrytym pasiedžańni spravu Daičy Jošydy na pratest staršyni Viarchoŭnaha sudu.
Pavodle vyraku sudu Kastryčnickaha rajonu Miensku ad 28 krasavika 2017 hodu hramadzianin Japonii byŭ asudžany pavodle č.1 st.333-1 KK na 4 hady pazbaŭleńnia voli biez kanfiskacyi majomaści i pavodle č. 2 art.295 KK na 3 hady pazbaŭleńnia voli biez kanfiskacyi majomaści. Pa sukupnaści złačynstvaŭ šlacham častkovaha składańnia pakarańniaŭ było pryznačana pakarańnie ŭ vyhladzie 4 hadoŭ 6 miesiacaŭ pazbaŭleńnia voli z adbyvańniem pakarańnia ŭ papraŭčaj kalonii va ŭmovach uzmocnienaha režymu biez kanfiskacyi majomaści.