24 maja ŭ Krakavie zavieršyłasia mižnarodnaja kanfierencyja «Za našu i vašu svabodu», arhanizavanaja polskim Instytutam nacyjanalnaj pamiaci. Na sustrečy była pryniataja rezalucyja suprać maršaŭ u Hajnaŭcy, paviedamlaje radyjo «Svaboda».
Udzielniki hetych maršaŭ hieraizujuć asobu Ramualda Rajsa, viadomaha pad mianuškaj «Bury» — kamandzira antykamunistyčnaha partyzanskaha adździeła, jaki zabivaŭ u tym liku biełarusaŭ Padlašša.
U krakaŭskaj kanferencyi ŭziali ŭdzieł navukoŭcy, vieterany polskaha antykamunistyčnaha padpolla i dysidenty z postsavieckich krainaŭ — Azierbajdžana, Armienii, Hruzii, Ukrainy, Litvy, Biełarusi, a taksama z Čačenii.
Biełaruś na joj reprezientavali kiraŭniki Kansiervatyŭna-chryścijanskaj partyi BNF. Ź inicyjatyvy Zianona Paźniaka kanferencyja pryniała «Zvarot da ŭsich polskich patryjotaŭ i miascovych uładaŭ u spravie maršu pamiaci «Vyklatych žaŭnieraŭ» i dziejnaści Ramualda Rajsa «Buraha».
«Źviartajemsia da polskich miascovych uładaŭ i da polskich patryjotaŭ, kab siońnia asoby, u ščyraści namieraŭ i patryjatyźmie jakich my nie sumniavajemsia, baroniačy pamiać pra «vyklatych žaŭnieraŭ», uzhadniali heta z pravam, z ahulnym intaresam i spraviadlivym padychodam, nie dazvalali, nie pravodzili tak zvanych «maršaŭ Buraha» i nie ŭdzielničali ŭ ich, kirujučysia dziaržaŭnymi intaresami ciapierašniaj Polščy, jakija siońnia palahajuć na abnižeńni ŭzroŭniu niehatyŭnych emocyj pamiž polskim i biełaruskim narodami, na raźvićci supracoŭnictva, zasnavanaha na daviery i ŭzajemna karysnaj mirnaj pracy», — havorycca ŭ rezalucyi.
Čytajcie taksama: Biełaruskaja pamiać pra «vyklatych žaŭnieraŭ»
