Alaksandr Łukašenka i fiederalny kancler Aŭstryi Siebascjan Kurc praviali razmovu, pa vynikach jakoj kiraŭnik Biełarusi atrymaŭ zaprašeńnie na vizit u Vienu.
Dla biełaruskich palityčnych realij hetaja situacyja davoli redkaja — Łukašenka ŭ Zachodniaj Jeŭropie nie časty hość.
«Naša Niva» paprasiła padzialicca čakańniami i prahnozami pa hetaj padziei Valeryja Varanieckaha — byłoha pasła Biełarusi ŭ Aŭstryi, a ciapier kiraŭnika kamisii pa mižnarodnych spravach parłamienta.
«Naša Niva»: Ci možna ličyć hetaje zaprašeńnie pośpiecham biełaruskaj dypłamatyi?
Valeryj Varaniecki: Hetaje zaprašeńnie nie vypadkovaje. Chaču nahadać, što Kurc niekali nanios nam pieršy aficyjny vizit u historyi dvuchbakovych adnosin jak ministr zamiežnych spraŭ Aŭstryi, tady jon sustrakaŭsia z Łukašenkam. Taksama jon tut byŭ ź vizitam jak staršynia Arhanizacyi pa biaśpiecy i supracoŭnictvu ŭ Jeŭropie, udzielničaŭ u parłamienckaj siesii ŭ Minsku i tady taksama sustrakaŭsia z Łukašenkam. Možna pryhadać i sustreču prezidentaŭ u Ńju-Jorku. Tamu ja tut niečakanaha ničoha nie baču, heta inercyja adnosin.
«NN»: U rasijskim ekśpiertnym asiarodku ŭžo hučać dumki, što hety vizit budzie ŭ piku Rasii.
VV: Tolki biezadkaznyja ludzi mohuć tak śpiekulavać. Rasija dla Biełarusi samy hałoŭny partnior, pra heta nie viadziecca dyskusij. Adnak naš prezident zaŭsiody kazaŭ, što Biełaruś budzie pravodzić šmatviektarnuju palityku — my zaŭsiody da hetaha imknulisia, ale nie zaŭsiody mahli zabiaśpiečyć tuju šmatviektarnaść, tamu što byli i sankcyi, i abmiežavańni. Heta nie dazvalała ŭ poŭnaj miery raźvivać zachodni viektar.
I vielmi dobra, što my siońnia majem mahčymaść zbałansavać adnosiny z hieapalityčnymi hulcami. Dla nas adnosiny ź Jeŭrasajuzam vielmi važnyja: heta i naš rynak (druhi paśla Rasii), i resursy, i technałohii. Da i prosta Jeŭropa — heta naš vialiki susied. Tamu nijakaj havorki pra «piku» vieścisia nie moža, heta nie supracoŭnictva suprać kahości, a supracoŭnictva na karyść zabieśpiačeńnia intaresaŭ Vialikaj Jeŭropy.
«NN»: Nakolki hety vizit palepšyć usprymańnie Łukašenki ŭ Jeŭropie? Doŭhi čas jon ličyŭsia nielihitymnym.
VV: Kali siudy pryjazdžajuć kiraŭniki pieršych krain Jeŭropy, deputaty, to ja liču niasłušnym navat stavić pytańnie pra lehitymizacyju — jano źniataje.
Biezumoŭna, heta budzie vielmi važny krok dla raźvićcia nie tolki biełaruska-aŭstryjskich, ale i dla stvareńnia impulsu raźvićcia biełarusa-jeŭrapiejskich adnosin ahułam. Hałoŭnaje, što Biełaruś takimi krokami vychodzić na farmiravańnie paŭnavartasnaha zachodniaha viektara palityki, pry hetym zachoŭvajučy dobryja adnosiny z Rasijaj. Heta važny dla zabieśpiačeńnia niezaležnaj dziaržavy bałans. Tak, my kažam pra niejtralnaść, ale niejtralnaść nie roŭnavydalenuju, a roŭnanabližanuju da partnioraŭ.
«NN»: A pra što Kurc z Łukašenkam buduć havaryć? Ci buduć aŭstryjcy padymać tradycyjna adčuvalnyja dla kiraŭnika Biełarusi temy raźniavolvańnia hramadstva i dziaržaŭnaj sistemy?
VV: Aŭstryjcy pravodziać prahmatyčnuju źniešniuju palityku, niekali Brusel uvodziŭ navat sankcyi suprać Vieny za toje, što da ŭłady tam pryjšła pravaja partyja. U aŭstryjcaŭ svajo bačańnie Biełarusi, jany ŭ svoj čas vielmi mocna spryčynilisia da admieny sankcyj u adnosinach da našaj krainy, adyhrali chiba nie hałoŭnuju rolu. I ŭ palitycy hałoŭnaje — heta nacyjanalnyja ekanamičnyja i palityčnyja intaresy, aŭstryjcy dumajuć pra heta, na prahmatyčnych rečach i budzie zasiarodžana ŭvaha.
Heta buduć sustrečy ź biźniesam, dla nas heta važna. Aŭstryja — bahataja vysokatechnałahičnaja kraina. Zrazumieła, što budziem prapanoŭvać im inviestavać, a jany buduć cikavicca, jak lepš heta zrabić. Zrešty, Aŭstryja i źjaŭlajecca adnym z samych vialikich inviestaraŭ u našu ekanomiku. I heta nie niejkija kredyty ci pieravody, jakija prachodziać praz bankaŭskija sistemy inšych krain, a sapraŭdy pramyja inviestycyi. Zhadajcie toj ža «Kranaspan», jaki ŭžo piać, zdajecca, zavodaŭ zbudavaŭ u nas. Tema biznesa budzie adnoj z hałoŭnych.