U Barysavie pačaŭsia čarhovy sud nad vajskoŭcam 72-ha hvardziejskaha Abjadnanaha navučalnaha centra ŭ Piečach. Padsudny — staršy lejtenant Hleb Čajkoŭski. Abvinavačvańnie jamu pradjaŭlena pa č.1, č.2 art. 455 KK — «Złoŭžyvańnie ŭładaj, spałučanaje z hvałtam», paviedamlaje Tut.by.
Abvinavačany Hleb Čajkoŭski. Fota: Kaciaryna Pancialejeva.
Pa viersii abvinavačvańnia, Čajkoŭski biŭ vajskoŭcaŭ nahoj, sapiornaj łapatkaj, mietaličnaj antenaj, draŭlanaj pałkaj.
Pa spravie prachodziać 17 paciarpiełych. 29 maja ich nie vyklikali. U spravie kala 16 epizodaŭ.
Usio adbyvałasia ŭ lipieni-žniŭni 2017 hoda. Hleb udakładniŭ, što było heta na tankadromie padčas zaniatkaŭ pa vadžeńni, jakija jon pravodziŭ.
Hleb nie admaŭlajecca davać pakazańni. Padčas dopytu jon padrabiazna spyniajecca na kožnym epizodzie. Nie vyklučaje, što ŭ niekatorych radavych byli pryčyny jaho ahavorvać.
Hleb nie admaŭlaje, što šaściora sałdat, ź jakimi jon u hety pieryjad pracavaŭ, byli «prablemnymi».
Adzin z epizodaŭ adbyŭsia, kali ŭ sałdataŭ było pieršaje vadžeńnie. Upieršyniu sutykajučysia ź vialikaj technikaj, tłumačyć abvinavačvany, radavyja časta niervujucca. Niervavaŭsia i K. Kab padbadzioryć jaho, Čajkoŭski pačaŭ razmovu. Padčas razmovy jany, praciahvaje Hleb, uspomnili film «U 47 rocie». I ŭ ich naradziłasia fraza: vytrymaješ ty, K., 47 udaraŭ antenaj-ukazkaj za «sučku»? Pad «sučkaj» mieŭsia na ŭvazie peŭny vid techniki.
— Jak heta — udary za techniku? — udakładniŭ dziaržabvinavaŭca.
— Nu, a jak desantniki bjuć butelki ab hałavu za VDV.
— Vy sprabavali pieravieści strach na bol?
— Ja jaho nie biŭ, heta byli dotyki. Paśla 22 udaraŭ jon skazaŭ: «Dosyć», — i ja pierastaŭ… Samaje hałoŭnaje, jamu nie było baluča, — apisvaje toje, što adbyłosia abvinavačany.
Darečy, heta byŭ nie adziny vypadak, kali Čajkoŭski vykarystoŭvaŭ mietaličnuju antenu. U suviazi z hetym sudździa spytaŭ: «Čamu ŭ vas byli masavyja dotyki antenaj?»
— Jana ŭ mianie zaŭsiody była ŭ rukach, — adkazaŭ abvinavačany.
Pry hetym jon paviedamiŭ, što «časta dotyki byli vypadkovymi». Akramia taho, «sałdaty paśla hetaha da lekaraŭ nie źviartalisia i nie kulhali».
