Źmitra Daškieviča abvinavacili ŭ parušeńni paradku praviadzieńnia masavych mierapryjemstvaŭ. A 3-j hadzinie nočy jon užo byŭ ź siamjoj.
«Chacieli vymusić źniać raściažku», — kamientuje Źmicier. Vielizarny płakat «Kurapaty — daroha śmierci» milicyja pakinuła ŭ siabie.
Skrynšot ź videatranślacyi Źmitra Daškieviča
Što tyčycca dalejšych dziejańniaŭ pa abaronie Kurapataŭ, to Źmicier praciahnie štopiatnicu pikietavać restaran «Pajedziem pajadzim».
«Bolš ja nie mahu zrabić u siłu siamiejnaj i pracoŭnaj zaniataści. Mienš zrabić mnie nie dazvalaje sumleńnie, — kaža Źmicier Daškievič. — Budziem rychtavać infarmacyjnyja materyjały, na hetym tydni pačniom rabić kryžy, kab mierapryjemstvy pa abaronie Kurapataŭ byli bolš razhornutyja».
Źmicier zaznačaje, što ŭ piatnicu, 15 červienia, da restarana padjechała prykładna 10-12 mašyn. Učora, 22 červienia, — šeść. Pałova ź ich z rasijskimi numarami.
«My nikomu nie pieraškadžajem, my prosta zapytvajemsia, ci viedajuć jany pra Kurapaty, dajom buklety. U pryncypie, usie viedajuć. Ja dumaju, ludzi jeduć siudy ź idejnych pryčyn, pračytaŭšy pra supraćstajańnie la Kurapataŭ pad bieł-čyrvona-biełym ściaham. Niekatoryja kryčać: «Prybiarycie polskuju anuču, vykliču milicyju». Niekatoryja hazujuć pierad znakam «Abmiežavańnie chutkaści — 5 km/h». To bok heta ludzi, jakija chočuć svaim naviedvańniem prademanstravać, što suprać nas», — kamientuje Źmicier.
Jon adznačaje, što ŭsio prachodzić spakojna, aktyvisty razmaŭlajuć z supracoŭnikami restaracyi i pišuć skarhi.