Voś padčas viačery mały siadzić u taty na rukach za ahulnym stałom i radujecca mahčymaści pabyć razam z usimi. Svaju radaść jon vyražaje tak burna, što ŭ adno imhnieńnie tataŭ vialiki kubak pierakulvajecca, i haračaja harbata vylivajecca na dzicia. Małoje płača ad bolu i kryŭdy, a darosłyja mitusiacca i nie viedajuć, čym dapamahčy…
— U paraŭnańni ź minułymi hadami kolkaść apiokaŭ u dziaciej skaraciłasia, ale ŭsio roŭna ličba niemałaja — ad 6 da 10 % ad usich dziciačych traŭmaŭ, — raskazvaje ŭrač-traŭmatołah 3-j dziciačaj rajonnaj palikliniki Minska Uładzimir Bakanoŭski. — Bolš za pałovu apiečanych majuć patrebu ŭ abaviazkovaj špitalizacyi, i adzin ź dziesiaci padviarhajecca apieracyjam, niaredka paŭtornym. Bolšaja častka dziaciej, jakija atrymlivajuć apioki, va ŭzroście 4—5 hadoŭ. Samyja maleńkija najčaściej atrymlivajuć apiok padčas pierakulvańnia na siabie kubkaŭ, talerak z haračaj harbataj ci małakom u toj pieryjad, kali jany zastajucca za stałom adny ci z-za niaŭvažlivaści darosłych. U adnym ź piaci vypadkaŭ apioki dzieciam nanosiać darosłyja. Značna bolš niebiaśpiečnyja apioki połymiem, jakija čaściej nazirajem u dziaciej siaredniaha i starejšaha ŭzrostu. Ich atrymlivajuć padčas hulniaŭ kala vohniščaŭ ci z vohnieniebiaśpiečnymi pradmietami. Byvajuć vypadki, kali ad ahniu pakutujuć zusim maleńkija dzieci. Niekatoryja mamy vystaŭlajuć kalaski ź dziećmi na adkrytyja bałkony, padmianiajučy hetym prahułki na śviežym pavietry. I na dzicia padaje źvierchu haračy niedakurak, jaki i vyklikaje zaharańnie adzieńnia.
Što rabić, kali dzicia atrymała apiok? Zdajecca, u siamji ŭsie viedajuć, jak ź imi zmahacca. Adzin prapanoŭvaje pasypać kruchmałam, druhi — prykłaści ciortuju bulbu, treci — pamazać słaniečnikavym alejem, narešcie, niechta ŭspaminaje, što apioki lečacca ablapichavym alejem… Spyniciesia! Paškadujcie dzicia.
Samaje lepšaje, što možna zrabić u hetaj situacyi, — prykłaści choład ci patrymać apiok pad pratočnaj chaładnavataj vadoj chvilin 15—20. Ale heta mahčyma tolki ŭ vypadku, kali cełasnaść skurnaha pokryva nie paškodžana. Kali heta chimičny apiok, to važna zmyć ci niejtralizavać aktyŭnaje rečyva.
— Na hetym etapie nielha prymianiać maślenyja mazi i inšyja tłuščaźmiaščalnyja pradukty, — tłumačyć staršaja miedycynskaja siastra chirurha-traŭmatałahična-artapiedyčnaha adździaleńnia 3-j dziciačaj rajonnaj palikliniki Minska Hanna Samsonik.
— Vielmi raspaŭsiudžana pamyłka, što apiok treba zmazać čymści tłustym — naprykład, śmiatanaj ci alejem. Heta niedapuščalna, bo tolki ŭzmocnić ciažkaść paražeńnia, a piersanału ŭ špitali daviadziecca vydalać maślenuju plonku, pryčyniajučy dadatkovyja pakuty dziciaci.
Taksama nie varta samastojna vydalać z paciarpiełaha frahmienty abharełaha adzieńnia. Heta moža pryvieści da adsłajeńnia vialikich učastkaŭ skury, krovaciačeńnia, a paśla i da inficyravańnia rany. Nie treba samastojna pravodzić apracoŭku rany. Biez abiazbolvańnia heta pryčynić dziciaci dadatkovyja pakuty i moža spravakavać šok ci ŭzmacnić jaho
Raspaŭsiudžanyja pamyłki
Uvodzić preparaty, nakładvać mazi samastojna nielha. Kali rabić heta bieź śpiecyjalnych viedaŭ, stan paciarpiełaha tolki pahoršycca. Hetak ža niapravilna samastojna ačyščać apiokavyja rany, asabliva pry adsutnaści pieraviazačnaha materyjału i adekvatnaha abiazbolvańnia. Nakładać žhut biez asablivaj nieabchodnaści taksama nie rekamiendujecca. Heta pryviadzie da ŭzmacnieńnia acioku. Kab nie dadavać pakut i nie ŭnieści infiekcyju, nie prakołvajcie puchiry, jakija źjavilisia na paškodžanaj skury.
