Śledčy kamitet vystupiŭ z aficyjnaj zajavaj pa spravie kiraŭnika Brasłaŭskaha rajvykankama Uładzimira Dranieŭskaha. «Naša Niva» ŭčora pisała, što čynoŭnik razam z žonkaj byŭ zatrymany 27 červienia.
Uładzimir i Alena Dranieŭskija ŭ Sierbii. Fota ok.ru.
«Śledčym kamitetam rasśledujecca kryminalnaja sprava ab karupcyi ŭ dačynieńni da staršyni Brasłaŭskaha rajonnaha vykanaŭčaha kamiteta, a taksama jaho žonki — načalnika adździeła ekanomiki vykanaŭčaha kamiteta, — prakamientavaŭ Śledčy kamitet na svajoj staroncy ŭ telehramie. — Słužbovyja asoby zatrymany supracoŭnikami milicyi pa padazreńni ŭ pieravyšeńni ŭłady i słužbovych paŭnamoctvaŭ i atrymańni chabaraŭ za vyrašeńnie pytańniaŭ, jakija ŭvachodziać u ich kampietencyju».
Suprać Dranieŭskaha zaviedzienaja kryminalnaja sprava pa č.3 art.430 (Atrymańnie chabaru), č.3 art.426 (Pieravyšeńnie słužbovych paŭnamoctvaŭ). Čynoŭnik moža atrymać da piatnaccaci hadoŭ turmy. Suprać Aleny Dranieŭskaj zaviedzienaja sprava taksama pa atrymańniu chabaru i «Pasobnictva».
Ciapier muž i žonka znachodziacca ŭ izalatary. Viadziecca śledstva.
Uładzimiru Dranieŭskamu 41 hod. Jon rodam z Čašnikaŭ. Skončyŭ Sielskahaspadarčuju akademiju ŭ Horkach pa śpiecyjalnaści «Miechanizacyja mielijaratyŭnych i vodahaspadarčych rabot» i «Buchhałtarski ŭlik».
Doŭhi čas pracavaŭ u rodnym horadzie na pasadach, źviazanych z ŽKH. U 2011 byŭ nazvany «Čałaviekam hoda Viciebščyny». Žanaty, maje dvaich dziaciej.
U 2015 hodzie Dranieŭski staŭ staršynioj Brasłaŭskaha rajvykankama.
