Jak minimum, 30 čałaviek byli zatrymanyja ŭ stalicy Biełarusi na Dzień Niezaležnaści za pratest suprać ułady Alaksandra Łukašenki. Takija źviestki sabrali pravaabaroncy-viasnoŭcy. Siarod zatrymanych jak maładyja ludzi, tak i piensijaniery.
U skviery na bulvary Tałbuchina mieła prajści «Akcyja vyzvaleńnia i salidarnaści», da jakoj zaklikaŭ Mikoła Statkievič. Niesankcyjanavanuju akcyju spynili supracoŭniki milicyi ŭ cyvilnym. Zatrymanych ludziej dastavili ŭ Pieršamajski RUUS. Amal usie jany byli viečaram adpuščanyja biez składańnia pratakołaŭ, ale niekatorych pratrymali bolš za 6 hadzinaŭ.
Sam Mikoła Statkievič byŭ zatrymany 3 lipienia a 11:30, kali vychodziŭ z domu. Noč palityk pravioŭ u CIP.
Miarkujecca, što siońnia ŭ sudzie Minskaha rajona projduć sudy nad Viačasłavam Siŭčykam i Maksimam Viniarskim, što noč praviali ŭ Centry izalacyi pravaparušalnikaŭ. Zatrymany byŭ pa darozie ŭ aeraport i Ryhor Kastusioŭ, što pavinien byŭ jechać u Varšavu. Usie jany ŭdzielničali ŭ akcyjach pratestu suprać pabudavanaha kala Kurapat «restarana na kostkach».
U sieradu, a 14-j, la svajho doma byŭ zatrymany Alaksiej Turovič.
Nahadajem, što 30 červienia byli zatrymanyja i asudžanyja na sutki Pavieł Sieviaryniec, Dzianis Urbanovič, Volha Mikałajčyk.
