Sustreča zaplanavanaja 24—25 kastryčnika na forumie rehijonaŭ Biełarusi i Ŭkrainy ŭ Homli, piša Radyjo Svaboda.

Na Pieršym forumie rehijonaŭ Biełarusi i Ŭkrainy, jaki adbudziecca 24—25 kastryčnika ŭ Homli, buduć vypracavanyja novyja inicyjatyvy i formy ekanamičnaha, investycyjnaha, navukova-techničnaha i kulturnaha supracoŭnictva krain na mižrehijanalnym uzroŭni.

Jak paviedamili Svabodzie ŭ Čarnihaŭskaj abłasnoj dziaržaŭnaj administracyi, forum adbudziecca pad patranatam Kabinetu ministraŭ Ukrainy i Savietu ministraŭ Biełarusi.

«Čakajecca ŭdzieł prezydentaŭ abiedźviuch krain», — dadali ŭ administracyi.

Z pačatku hetaha hodu praviadzieńnie forumu było asnoŭnaj temaj dźviuch telefonnych razmoŭ Alaksandra Łukašenki i Piatra Parašenki. Jany adbyvalisia ŭ tyja dni, kali čarnihaŭski sud razhladaŭ spravu zatrymanaha va Ŭkrainie hramadzianina Biełarusi Juryja Palityki pavodle abvinavačańnia ŭ źbirańni sakretnaj infarmacyi na karyść inšaj dziaržavy.

Ukrainskija eksperty vykazvali mierkavańni, što ŭkrainski žurnalist Paŭło Šarojka byŭ zatrymany ŭ Biełarusi mienavita ŭ adkaz na zatrymańnie Juryja Palityki ŭ Čarnihavie. Paŭło Šarojka ŭžo asudžany biełaruskim sudom na 8 hod turmy za špijanaž, u toj čas jak ukrainski sud ź lutaha nia moža vynieści verdykt ab adpaviednaści abvinavačańnia zakanadaŭstvu, kab pačać razhlad spravy pa sutnaści.

Ciapier ułady Biełarusi i Ŭkrainy abmiarkoŭvajuć abmien Šarojki na Palityku: pradstaŭnik Ministerstva zamiežnych spraŭ Ukrainy Ŭładzimir Škuroŭ nazvaŭ hetuju temu «dalikatnym pytańniem». Paźniej i staršynia Kamitetu dziaržaŭnaj biaśpieki Biełarusi Valer Vakulčyk nia vyklučyŭ, što Miensk i Kijeŭ mohuć abmianiacca hramadzianami, abvinavačanymi ŭ špijanažy.

Papiaredniaja sustreča Alaksandra Łukašenki i Piatra Parašenki prajšła 2 listapada 2017 hodu ŭ Abu-Dabi. Tady, zhodna z aficyjnymi paviedamleńniami abodvuch bakoŭ, Łukašenka z Parašenkam razmaŭlali pra ekanomiku — biełaruski kiraŭnik vykazaŭ spadzieŭ na rost tavarazvarotu i pašyreńnie supracy rehijonaŭ.

Praz dva z pałovaj tydni paśla hetaj sustrečy prezydent Ukrainy Piatro Parašenka svaim ukazam zvolniŭ Uładzimiera Sińkieviča z pasady namieśnika staršyni Słužby zamiežnaj vyviedki Ŭkrainy. Choć abhruntavańnia takoha kadravaha rašeńnia va ŭkazie nie było, bolšaść ekspertaŭ źviazali jaho jakraz sa «špijonskim skandałam»: KDB Biełarusi 20 listapada 2017 hodu zajaviŭ pra vykryćcio «ŭkrainskaj špijonskaj sietki», pracu jakoj nibyta kaardynavaŭ supracoŭnik Hałoŭnaha ŭpraŭleńnia vyviedki Ihar Skvarcoŭ, jaki dziejničaŭ jak supracoŭnik ambasady.

Skvarcova abviaścili «personaj non-hrata». I pa hetaj ža spravie byŭ aryštavany karespandent Ukrainskaha radyjo Paŭło Šarojka.

Alaksandar Łukašenka ŭ kancy listapada 2017 hodu padčas rabočaj pajezdki ŭ Homielskuju vobłaść paćvierdziŭ žurnalistam, što na jahonaj sustrečy ź Piatrom Parašenkam u Abjadnanych Arabskich Emiratach abmiarkoŭvałasia i «špijonskaja» sprava.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?