Fota sa staronki Kryściny ŭ UKantakcie

Fota sa staronki Kryściny ŭ UKantakcie

U noč na 20 lipienia ŭ Babrujsku adbyłosia padvojnaje zabojstva. Padazravany, Alaksandr A. zatrymany, jon daje pakazańni. A rodnyja i znajomyja adnoj z zabitych — 26-hadovaj Kryściny A. dahetul nie mohuć pavieryć u toje, što adbyłosia, piša Jeŭraradyjo.

Dziaŭčyna naradziłasia ŭ ahraharadku Zavałočycy Hłuskaha rajona, u Babrujsku zdymała kvateru i pracavała ŭ hastranomie «Kvartał smaku» pradaŭcom-kasiram. Kryścina zaŭsiody była na suviazi ź siastroj, dapamahała joj ź plamieńnikam, lubiła katacca na viełasipiedzie i hulać u piejntboł.

Znajomaja zabitaj (imia jość u redakcyi) apisvaje Kryścinu A. jak viasiołuju, dobruju i spahadlivuju dziaŭčynu. Na pytańnie, ci była jana tusoŭščycaj, naadrez kaža: nie.

«Jana nie była zaŭvažanaja ŭ niejkich pjankach, nie paliła, pa-mojmu. My chadzili na fiestyval lichtaroŭ, Kryścina navat matam nie łajałasia. Jana nie była tusoŭščycaj. Pracujučy ŭ kramie za 350 rubloŭ, asabliva nie patusuješsia.

Pracavała šmat, vychodziła na źmienu, kali prasili. A navat kali jana i pajšła na dyskateku, heta zakonam nie zabaroniena. Vy dakładna ni na adnoj fatahrafii nie ŭbačycie jaje z vypiŭkaj, — raspaviadaje surazmoŭca Jeŭraradyjo. — Kryścina była svabodnaj dziaŭčynaj. A los rasparadziŭsia, što mienavita ŭ hety dzień jana pajšła ź niejkaj Alesiaj, i tak adbyłosia».

Fota sa staronki Kryściny ŭ UKantakcie

Fota sa staronki Kryściny ŭ UKantakcie

Pa słovach surazmoŭnicy Jeŭraradyjo, druhuju dziaŭčynu, 27-hadovuju Alesiu, ni jana, ni siastra Kryściny nie viedali.

«Alesiu, pa-mojmu, naohuł nichto nie viedaŭ. My hladzieli ŭ internecie, u siabrach u Kryściny u «Vkontaktie» jaje niama. Nie viedaju navat, jak jana vyhladaje».

U noč z 19 na 20 lipienia dziaŭčyny pravodzili čas u kłubie «Prestyž». Tam jany sustrelisia z Alaksandram A. i vyrašyli pajechać da jaho dadomu. Praź niekalki hadzin u milicyju patelefanavali — dziaŭčyna (pa słovach krynicy Jeŭraradyjo, heta była Kryścina) paśpieła prakryčać, što jaje zabivajuć, ale nie zmahła nazvać dakładny adras. Kali milicyja znajšła tuju samuju kvateru, abiedźvie dziaŭčyny byli miortvyja.

Surazmoŭnica kaža, što u Babrujsku nie šmat kłubaŭ z načnymi dyskatekami, i «Prestyž» ličycca adnoj ź lepšych ustanoŭ: «Heta nie «bydła-paci» niejkaje, heta narmalny pa babrujskich mierkach kłub».

Čamu Kryścina apynułasia ŭ kvatery ŭ nieznajomaha mužčyny? Jak stała viadoma Jeŭraradyjo, razam z rečami ź jaje pracy rodnym dziaŭčyny pieradali klučy ad kvatery, jakuju jana zdymała. Znajomaja Kryściny miarkuje, što mienavita z-za zabytych klučoŭ dziaŭčyna nie pajechała da siabie i vyrašyła zastacca razam z Alesiaj u Alaksandra: dačakacca ranicy i pajści na pracu.

«Pić jana nie mahła, tamu što joj da siomaj hadziny na pracu. Tym bolš, jana pracuje ź ludźmi, jana nie mahła dazvolić sabie pryjści niećviarozaj. Z boku administracyi da jaje nikoli nie było pretenzij».

Jak raspaviali Jeŭraradyjo susiedzi Alaksandra A., jon žyŭ u kvatery na Łyńkova razam z maci. U noč, kali adbyłosia złačynstva, žančyna była na dačy. Sam Alaksandr O. ŭ 2016 hodzie vyjšaŭ z turmy i niekatory čas žyŭ z maci. A ŭ apošnija miesiacy pražyvaŭ razam z sužycielkaj ŭ centry Babrujska.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?