Siarhiej Piatruchin zatrymany ŭ dvary svajho domu ŭ Bieraści, jaho adviaźli ŭ Leninski RAUS, paviedamiŭ jahony siabra Alaksandar Kabanaŭ. Na telefanavańni Piatruchin nie adkazvaje, piša Radyjo Svaboda.

Na zatrymańni prysutničała nia mienš za šeść milicyjantaŭ, u tym liku z aŭtamatyčnaj zbrojaj.

Siarhieju Piatruchinu admovilisia pakazać dakumenty, pavodle jakich jaho zatrymlivajuć — milicyjant pahadziŭsia tolki začytać papiery. Raniej Piatruchin atrymaŭ pozvu ŭ Bieraściejski mižrajonny śledčy kamitet, dzie suprać jaho raspačataja kryminalnaja sprava za abrazu. Adnak nijakich pracesualnych dziejańniaŭ z błohieram pakul nie pravodzili. Jon nia viedaje, u čym kankretna jaho vinavaciać

Jak śćviardžaje Alaksandar Kabanaŭ, pravaachoŭniki taksama majuć order na ahlad kvatery, kanfiskujuć techniku. Jon miarkuje, što zatrymańnie — pomsta z boku majora Mikałaja Rabuški.

Major uzimku vioz Kabanava i Piatruchina ŭ sud, try hadziny trymaŭ ich u aŭtazaku, dzie było vielmi chałodna, «niedzie pad 27 hradusaŭ marozu». Piatruchin niadaŭna raskazaŭ pra zdareńnie ŭ sacsietkach, pisaŭ, «tak navat fašysty nia robiać». Taksama Piatruchin patrabavaŭ u prakuratury pryvieści pravierku taho faktu, Kabanaŭ uzdymaŭ hetaje pytańnie na sustrečy z pamočnikam Alaksandra Łukašenki pa Bieraściejskaj vobłaści.

Jak skazaŭ Svabodzie bieraściejski pravaabaronca Raman Kiślak, jon nie vyklučaje, što zatrymańnie Siarhieja Piatruchina moža być preventyŭnym pierad masavymi hulańniami na Dzień horadu ŭ Bieraści, jakija prachodziać 28—29 lipienia.

«Viedaju, što zatrymany, ale na jakoj padstavie, nieviadoma, — kaža Kiślak. — Vierahodna, heta preventyŭnaje zatrymańnie. Mahčyma, heta źviazana sa śviatami. Jany pryjšli pravieści pieratrus, jon admoviŭsia, jaho zatrymali i dastavili».

Pravaabaronca pryjaždžaŭ u RAUS daviedacca pra los Piatruchina, adnak milicyjanty jaho nie puścili i vyšturchnuli adtul. Raman Kiślak pajechaŭ u prakuraturu pisać zajavu ab pieravyšeńni paŭnamoctvaŭ supracoŭnikami milicyi.

Клас
0
Панылы сорам
0
Ха-ха
0
Ого
0
Сумна
0
Абуральна
0