U Bieraści źjaviŭsia pomnik vydumanamu rasiejskamu piersanažu, desantniku Ściopačkinu. Jaho pastavili ŭ minułyja vychodnyja na dzień horada ŭ parku adpačynku imia 1 maja.
Desantnik Ściopačkin — piersanaž multyplikacyjnaj dyłohii Cimura Kurbanalijeva pra padletka, jaki samavolna pryzvaŭsia ŭ desantnyja vojski, upotaj ad maci i rabotnikaŭ vajenkamatu. Pastupova hieroj stanovicca sapraŭdnym desantnikam i navat pieramahaje na spabornictvach uzbrojenyja siły ZŠA.
Sajt bieraściejskaha harvykankama nazyvaje hetuju skulpturu padarunkam bieraściejcam ad desantnikaŭ Rasiei dy Biełarusi.
Inicyjatyva ŭstalavać skulpturu naležyć hienierał-majoru rasiejskaj armii Alaksandru Kuliku. Na adkryćci pomnika prysutničaŭ staršynia kamiteta pa abaronie Dziaržaŭnaj Dumy RF Uładzimir Šamanaŭ.
Desantnik Ściopačkin, što samavolna pryzvaŭsia ŭ vojska i staŭ rasiejskim hierojem.
Viadoma, što Šamanaŭ byŭ udzielnikam bajavych dziejańniaŭ padčas karabachskaha kanfliktu, vajavaŭ na baku Azierbajdžana. Šamanaŭ (siabra partyi «Jedinaja Rośsija») taksama kiravaŭ vajskovymi apieracyjami padčas vajny ŭ Čačenii, uznačalvaŭ apieracyju pa akupacyi Abchazii.
Adznačym, što bieraściejskija desantniki z 38-aj hvardziejskaj desantna-šturmavoj bryhady rehularna ŭdzielničajuć u sumiesnych vučeńniach z rasiejskimi kalehami, u tym liku z tymi, chto vajavaŭ va Ukrainie.
Aŭtar skulptury Alaksiej Čumakoŭ naradziŭsia ŭ rasiejskim Orsku. Skončyŭ Leninhradskaje nachimaŭskaha vajskova-marskoje vučylišča, paźniej Kijeŭskaje vyšejšaje vajskova-marskoje palityčnaje vučylišča i paśla vučoby byŭ raźmierkavany na słužbu ŭ Sievastopal. Praciahvaje ličyć siabie hramadzianinam SSSR. Žyvie ŭ Bieraści.
Pavodle siužetu Ściopačkin pry dapamozie admysłovaj kašy pieraŭtvaryŭsia ŭ sapraŭdnaha desantnika.
Rasiejski śled jość i ŭ karjery kiraŭnika Bieraścia Alaksandra Rahačuka. Jon skončyŭ Kurhanskaje vyšejšaje vajenna-palityčnaje avijacyjnaje vučylišča. I mienavita Rahačuk daŭ zhodu na ŭstanoŭku ŭ bieraściejskim parku imia 1 traŭnia hetaj sumnieŭnaj skulptury.
