«Centar kiravańnia raśśledavańniami», u ramkach prajektu jakoha žurnalisty Archan Džemal, Alaksandr Rastarhujeŭ i Kirył Radčanka adpravilisia ŭ Afryku, apublikavaŭ usiu najaŭnuju ŭ ich infarmacyju pra detali hetaj pajezdki, piša radyjo «Svaboda».
U stalicu Centralnaafrykanskaj Respubliki horad Banhi hrupa prylacieła ranicaj u subotu 28 lipienia. Trapić na bazu Bierenha, dzie, jak miarkujecca, rasiejskija najmity navučajuć nacyjanalnuju armiju CAR FACA, žurnalisty nie zmahli: u ich zapatrabavali dazvoł Minabarony CAR.
Zatym hrupa planavała patrapić u horad Bambary i sustrecca z supracoŭnikam struktury AAN u CAR (MINUSCO). Jon pavinien byŭ dać infarmacyju pa sytuacyi z rasiejskimi vajennymi instruktarami ŭ CAR, dapamahčy sa zdymkami załatych kapaleń Ndassima, a taksama abiacaŭ kantakty aficyjnych asobaŭ, jakija hatovyja byli havaryć pad zapis u Banhi.
Žurnalistaŭ zabili 30 lipienia z aŭtamatyčnaj zbroi za 180 km ad Banhi, havorycca ŭ paviedamleńni «Centra kiravańnia raśśledavańniami». Chto heta zrabiŭ i čamu — nieviadoma.
Miesca, dzie adbyłasia trahiedyja, znachodzicca pamiž nasielenymi punktami Sibiu i Kaha-Bandaro, što ŭ baku ad mierkavanaha maršrutu hrupy. U «Centry» nie viedajuć, čamu žurnalisty adchililisia ad maršrutu.
Džemal, Rastarhujeŭ i Radčanka pryjechali ŭ CAR pa turystyčnych vizach i nie byli akredytavanyja ŭ rasiejskaj ambasadzie i konsulstvie. Heta było źviazana z abjektam raśśledavańnia — «Pryvatnaj vajennaj kampanii Vahnera».
Raśśledavańnie doŭžyłasia ŭžo niekalki miesiacaŭ, i da momantu pajezdki vialikaja častka materyjałaŭ, jakaja mahła być sabrana ŭ Rasiei, užo była hatovaja, havorycca ŭ paviedamleńni «Centra kiravańnia raśśledavańniami».
Prajekt finansavaŭ investar Michaił Chadarkoŭski. Hrošy išli na apłatu pracy, pajezdak, achovy, kamunikacyj, pierasoŭvańniaŭ, strachovak i abstalavańnia.
Dastavić cieły zahinułych žurnalistaŭ u Rasieju pavinny ŭ subotu, 4 žniŭnia.
«Razam z šeraham mižnarodnych arhanizacyj «Centar kiravańnia raśśledavańniami» pravodzić ułasnaje raśśledavańnie z metaj vyśviatleńnia ŭsich abstavinaŭ trahiedyi i vyjaŭleńnia vinavatych», — havorycca ŭ paviedamleńni «Centru».
Andrej Kaniachin, hałoŭny redaktar «Centra kiravańnia raśśledavańniami», na zamovu jakoha Archan Džemal, Alaksandr Rastarhujeŭ i Kirył Radčanka pracavali ŭ centry, skazaŭ Nastojaŝiemu vriemieni, što nie vyklučaje taho, što zabojstva mahło być źviazana z prafesijnaj dziejnaściu žurnalistaŭ.
Zabity ŭ CAR žurnalist Archan Džemal nie chacieŭ jechać u hetuju, jakaja stała apošniaj dla jaho, kamandziroŭku ŭ Afryku. Pra heta raspavioŭ siabar i kaleha Archana žurnalist Vasil Pałonski.
Pra hibiel Archana Džemala, Kiryła Radčanki i Alaksandra Rastarhujeva stała viadoma 31 lipienia. Jany pajechali ŭ krainu, dzie ŭžo šmat hadoŭ nie ścichaje hramadzianskaja vajna, a ŭłada kantraluje tolki stalicu i najbližejšyja vakolicy, dziela zdymak filma ab «pryvatnaj vajennaj kampanii Vahnera». Zakazčykam byŭ prajekt «Centar kiravańnia raśśledavańniami» Michaiła Chadarkoŭskaha. Abstaviny hibieli žurnalistaŭ pakul dakładna nie ŭstanoŭleny.
