Pomnik vołatu Illu Muramcu adkryli ŭ čaćvier u kijeŭskim parku «Muromiec» (były park «Družby narodaŭ») na Truchanavym vostravie pasiaredzinie Dniapra, piša tass.ru.
Hieroj ruskich bylin paŭstaje ŭ daśpiechach na kani, na dreŭku jaho dzidy łunaje ściah z vyjavaj «Tryzuba». Bronzavaja skulptura, ustalavanaja na hranitnym pastamiencie na ŭzhorku, važyć bolš za dźvie tony, vyšynia da vastryja dzidy — siem mietraŭ.
«Illa Muramiec — heta naš vołat, naša historyja, jakuju sprabujuć vykraści», — kazaŭ na adkryćci mer Kijeva Vital Kličko.
Ukrainskija daśledčyki atajasamlivajuć Illu Muramca sa śviatym Illoj Piačerskim z Čarnihaŭščyny, moščy jakoha spačyvajuć u Kijeva-Piačerskaj łaŭry. Zhodna z hetaj viersijaj, Illa naradziŭsia niedaloka ad Kijeva — u Moraŭsku (Maravijsku) pad Čarnihavam, jaki ŭ staražytnaści nazyvaŭsia Muramskam, pamiž 1150 i 1165 hadami. A zahinuŭ va ŭzroście 40—55 hadoŭ, jak miarkujuć, pry ŭziaćci Kijeva kniaziem Rurykam Raścisłavičam u 1204 hodzie, kali Piačerskaja łaŭra była razhromlenaja sajuznymi Ruryku połaŭcami. Pryčynaj śmierci staŭ udar dzidy ci miača ŭ hrudzi.
