Na leta mnohija z nas płanujuć zamiežnyja vandroŭki. Dzieci zaŭždy ź nieciarpieńniem čakajuć taki adpačynak. Ale kab usie vašy płany ažyćciavilisia, i kab adpačynak nie skončyŭsia ŭžo na miažy, nieabchodna zahadzia pakłapacicca ab pravilnaści afarmleńnia dakumientaŭ. Varta pamiatać, što ŭ mnohich vypadkach dla vyjezdu niepaŭnaletnich za miežy krainy ich pašparta niedastatkova.
Vyjezd dziciaci za miažu tolki z adnym z baćkoŭ. Ci patrebna ŭ takim vypadku zhoda inšaha?
Pry vyjeździe za miežy Biełarusi ŭsim hramadzianam, niezaležna ad uzrostu, nieabchodna mieć pašpart.
Kali dzicia vyjazdžaje, naprykład, z mamaj, to zhoda taty nie patrabujecca, i naadvarot. Na miažy budzie dastatkova pradjavić pašpart z adznakaj ab dziciaci ŭ pašparcie taho z baćkoŭ, jaki ź im vyjazdžaje, što źjaŭlajecca pacviardžeńniem statusa zakonnaha pradstaŭnika.
Kali niechta z baćkoŭ suprać taho, kab dzicia pakidała Biełaruś, jon maje prava źviarnucca ŭ sud. U hetym vypadku dadzienyja dziciaci trapiać u bazu źviestak asob, čyje pravy na vyjezd za miažu časova abmiežavanyja. Niepaŭnaletnija sa śpisu zastanucca nievyjaznymi da toj pary, pakul baćki nie damoviacca albo sud nie vyniasie adpaviednuju pastanovu.
Jakija dakumienty nieabchodny, kali dzicia vyjazdžaje z babulaj, dziadulem ci prosta znajomym siamji?
Kab adpravić dzicia na adpačynak nie z baćkami, nieabchodna piśmovaja zhoda abaich zakonnych pradstaŭnikoŭ — taty i mamy. Takaja zhoda zaviarajecca nataryjalna ci ŭ padraździaleńni pa hramadzianstvie i mihracyi.
Vyjezd dziciaci za miažu na azdaraŭleńnie ŭ składzie arhanizavanaj hrupy
Jak i va ŭsich inšych vypadkach, dzicia musić mieć pašpart. Kali płanujecca vyjezd u krainy, dzie nieabchodna šenhienskaja viza, termin dziejańnia pašparta pavinien być nie bolš za 10 hod, da taho ž u im pavinny być nie mienš jak dźvie svabodnyja staronki. Kali dzicia jedzie ŭ supravadžeńni nastaŭnikaŭ, trenieraŭ, pradstaŭnikoŭ turystyčnaj kampanii, baćki taksama pavinny piśmova vykazać svaju zhodu na vyjezd dziciaci ŭ supravadžeńni hetych darosłych.
Praviły pierasiačeńnia miažy ź dziećmi možna ŭdakładnić na sajcie Dziaržaŭnaha pahraničnaha kamiteta.
Što rabić, kali za miažoj zhubilisia dakumienty? Kudy źviartacca pa dapamohu?
Pierad adjezdam niališnim budzie zrabić ksierakopiju pašparta. Vaźmicie z saboju inšyja dakumienty, jakija pacviardžajuć asobu na vypadak straty abo kradziažu pašparta, i paru fotazdymkaŭ, u tym liku dziaciej. Heta dapamoža pry pracedury pacviardžeńnia asoby.
Kali takaja niepryjemnaść usio ž zdaryłasia, — nieabchodna źviarnucca ŭ dypłamatyčnaje pradstaŭnictva ci konsulskuju ŭstanovu Biełarusi ŭ krainie znachodžańnia. Paśla pacviardžeńnia asoby konsuł vydaść paśviedčańnie na viartańnie ŭ Biełaruś.
Daviedacca ab tym, u jakich krainach raźmieščany dypłamatyčnyja i konsulskija ŭstanovy Biełarusi, možna tut.
Pryjemnaha padarožža!
