«Infarmacyja pra toje, što asudžany Siancoŭ A. H. nibyta pakinuŭ vypraŭlenčuju kaloniju, nie adpaviadaje rečaisnaści», — paviedamili ŭ pres-słužbie ŭpraŭleńnia Fiederalnaj słužby pa vykanańni pakarańniaŭ pa Jamała-Nienieckaj aŭtanomnaj akruzie.
Takim čynam, infarmacyja pra toje, što samalot z ukraincam- palitviaźniem Aleham Siancovym vylecieŭ z rasijskaha Salecharda, akazałasia falšyŭkaj. Nahadajem, što jaje raspaŭsiudziła ŭ fejsbuku žurnalistka Viktoryja Iŭleva.
Režysior Aleh Siancoŭ byŭ prysudžany ŭ Rasii da 20 hadoŭ źniavoleńnia za supraciŭleńnie anieksii Kryma — pavodle abvinavačvańnia, nibyta za arhanizacyju dyviersijnaj hrupy «Pravaha siektara». Jon nie pryznaŭ siabie vinavatym, zajaviŭ pra katavańni.
Try miesiacy tamu Siancoŭ abvieściŭ haładoŭku, patrabujučy vyzvaleńnia ŭsich ukrainskich palitviaźnieŭ, asudžanych u Rasii. Jana praciahvałasia 90 dzion, adnak treba ŭličvać, što Siancoŭ prymaŭ śpiecyjalnuju miedycynskuju sumieś. Kali b źniavoleny admoviŭsia ad jaje, jaho b advieźli ŭ balnicu i karmili b prymusova.
