Lidary piaci prykaśpijskich dziaržaŭ padpisali ŭ Aktau (abłasny centr na paŭdniovym zachadzie Kazachstana) Kanviencyju ab pravavym statusie Kaśpijskaha mora, praca nad jakoj viałasia 22 hady. Adnak pytańni zastalisia, adznačaje Deutsche Welle.
Prezidenty Rasii, Azierbajdžana, Irana, Kazachstana i Turkmienistana padpisali ŭ niadzielu, 12 žniŭnia, u kazachstanskim Aktau Kanviencyju ab pravavym statusie Kaśpijskaha mora, praca nad jakoj praciahvałasia z 1996 hoda.
Asnoŭnaja prablema, jakaja stajała pierad dziaržavami, zaklučałasia ŭ tym, ci prymianiać da Kaśpija pałažeńni Kanviencyi AAN pa marskim pravie 1982 hoda abo vykarystoŭvać padychod, jaki dziejničaje ŭ dačynieńni transhraničnych azior.
U vyniku było vyrašana, što asnoŭnaja płošča vodnaj pavierchni pryznajecca moram i zastajecca ŭ ahulnym karystańni bakoŭ, a ŭ dačynieńni da dna i nietraŭ budzie zafiksavany pryncyp, jaki praduhledžvaje ich padzieł na siektary pa damoŭlenaści na asnovie mižnarodnaha prava.
Kanviencyja ŭjaŭlaje saboj narmatyŭnuju bazu z prapisanymi ŭ joj fundamientalnymi pałažeńniami, adnak pry hetym nie pahłyblajecca ŭ detali.
Prezident Irana Chasan Raŭchani padkreśliŭ, što «pieramovy ŭ halinie raźmiežavańnia… pavinny być praciahnutyja». Pavodle jaho słoŭ, patrebna bolš peŭnaści ŭ pytańni mietadaŭ vyznačeńnia linij pry padziele dna i nietraŭ Kaśpija. Tamu patrebna raspracavać asobnyja damovy, padkreśliŭ Raŭchani.