Fota Vadzima Zamiroŭskaha
U kancy maja ŭ Miorach zdali novy budynak balnicy. Razam ź im źjaviłasia i novaja płatnaja pasłuha — zaraz z pacyjentaŭ, jakija lažać u stacyjanary, biaruć hrošy za zaradku telefonaŭ. «Chacieła zaradzić telefon, miedsiastra skazała, što za heta treba zapłacić 50 kapiejek», — raspaviadaje adna z pacyjentak balnicy. U miedustanovie śćviardžajuć, što ŭsio zakonna, piša Tut.by.
Pra novuju płatnuju pasłuhu raspaviała adna z pacyjentak balnicy.
— Na dniach pastupiła ŭ adździaleńnie. Padčas abychodu miedsiastra paviedamiła, što kali kamuści treba budzie zaradžać telefon, to za heta daviadziecca zapłacić 50 kapiejek, — raspaviadaje dziaŭčyna. — Nakolki pravamierna brać z pacyjentaŭ płatu za heta?
My źviarnulisia pa kamientar da kiraŭnictva balnicy. Tam rastłumačyli, što ŭ ich sapraŭdy całkam aficyjna isnuje takaja płatnaja pasłuha. Akramia taho, jość prejskurant i na pracu televizara, płanšeta, imbryka i inšych elektrapryboraŭ.
- Tak, u nas jość prejskurant płatnych pasłuh, na padstavie jakoha za hadzinu pracy zaradnaj pryłady dla mabilnaha telefona my spahaniajem płatu 23 kapiejki, — kaža namieśnik hałoŭnaha doktara pa miedycynskaj častcy Mijorskaj centralnaj rajonnaj balnicy Śviatłana Birukova. - Hety prejskurant zaćvierdžany z 1 vieraśnia 2017 hoda. Usie apłaty pravodziacca aficyjna, praz kasavy aparat. Ludzi sami padličvajuć, kolki hadzin zaradžali telefon, a potym iduć i płaciać.
Pa słovach Śviatłany Birukovaj, časam pacyjenty nie chočuć iści apłačvać pasłuhi sami. Kasavy aparat znachodzicca ŭ paliklinicy, a heta inšy budynak.
— Tamu staršaja miedycynskaja siastra źbiraje apłatu, niasie ŭ inšy budynak i pravodzić usio praz kasavy aparat, a potym u toj ža dzień prynosić čeki apłaty, — tłumačyć namieśnik hałoŭnaha ŭrača. - Usie čeki ŭ nas taksama zachoŭvajucca i ŭ elektronnym varyjancie, i ŭ papiarovym. Akramia taho, viadziecca žurnał, kudy ŭsio zapisvajecca — chto, jakuju sumu i za što zapłaciŭ.
Śviatłana Birukova padkreśliła, što «pacyjenty płaciać navat pa bolš nizkim taryfie, čym heta pavinna kaštavać».
- Heta niaŭličanaja elektraenierhija, jana nie dajecca prosta tak lačebnym ustanovam, - kaža miedyk. - Jość rascenki na pracu i inšych pryboraŭ. Da prykładu, hadzina karystańnia televizaram, noŭtbukam abo płanšetam kaštuje 11 kapiejek, heta ŭžo z PDV. Radyjopryjomnika — 8 kapiejek. Elektračajnik, jak i zaradki dla mabilnaha, — 23 kapiejki.
