Fota ź Vikipiedyi
Redaktaraŭ usich telekanałaŭ u składzie Nacyjanalnaj teleradyjokampanii Uzbekistanu ŭ žniŭni 2018 hodu papiaredzili, kab imia niabožčyka prezydenta Isłama Karymava z hetaha času naohuł nie pavinna zhadvacca ŭ efiry, piša Radyjo Svaboda.
Adzin ź viadučych raskazaŭ, što zahad nia ŭzhadvać imia Karymava va ŭsich pieradačach pastupiŭ ad dziaržaŭnaha daradnika prezydenta Chajrydyna Sułtanava:
«Kiraŭnictva skazała nam:» Kali imia Karymava prahučyć u efiry, vy zastaniaciesia biez hałavy. Heta zahad dziarždaradnika Sułtanava«, — pieradaŭ jon słovy kiraŭnika jaho padraździaleńnia.
Hałoŭny redaktar inšaha ŭzbeckaha telekanału paćvierdziŭ hetaje ŭkazańnie:
«Nia zhadvać u efiry imia Isłama Karymava — heta była nie rekamendacyja, a patrabavańnie», — skazaŭ jon. Ale, pavodle redaktara, «staroje pakaleńnie intelihiencyi časta ŭspaminaje Karymava», tamu na telekanale «ŭžyli zachady» i nia buduć dapuskać da efiru «asobaŭ z dadzienaj katehoryi ryzyki».
Mužčyna pryznaŭsia, što supracoŭnikam telekanału jašče z pačatku hodu rekamendavali mienš zhadvać imia Karymava i bolš kazać pra Šaŭkata Mirzijojeva, jaki staŭ prezydentam paśla śmierci Karymava ŭ vieraśni 2016 hodu.
Imia i vyjavy pieršaha prezydenta Ŭzbekistanu vyhaniajucca nia tolki z televizii. Niadaŭna vymovu za partret Karymava, jaki visieŭ u zali schodaŭ, atrymała kiraŭnictva Instytutu rukapisaŭ Akademii navuk Uzbekistanu. Paśla hetaha «padčas schodu kiraŭnictva Akademii navuk zahadała źniščyć usie partrety Karymava i lozunhi ź jaho cytatami», — raspaviadaje adzin z navukoŭcaŭ.
17 červienia 2018 h. adzin z studentaŭ Bucharskaha dziaržaŭnaha ŭniversytetu taksama paviedamiŭ Radyjo Svaboda, što z terytoryi VNU na hruzavoj mašynie vyvieźli ŭsie knihi Karymava i adpravili ich u makulaturu.
20 žniŭnia ŭłady taksama praviali rejdy siarod handlaroŭ suvenirami ŭ «karymaŭskich» miaścinach u Kaškadarjinskaj vobłaści i Samarkandzie. Na handlaroŭ, jakija pradavali mahnity i kalendary z vyjavaj eks-prezyidenta, nakłali štrafy, a tavar kanfiskavali.
